අන්තරාදායක ඖෂධ පෙති තොගයක් සමඟ විශ්‍රාමික වෛද්‍යවරයෙකු සහ තවත් පුද්ගලයෙකු සැකපිට අත්අඩංගුවට ගත් බව මිදිගම පොලිසිය පවසයි.

ඔවුන් සන්තකයේ තිබී අන්තරාදායක ඖෂධයක් වන 'ප්‍රීගැබලින්' වර්ගයේ මත්පෙති කරල් 1,270ක් පොලිස් භාරයට ගෙන ඇත.

අත්අඩංගුවට ගත් විශ්‍රාමික වෛද්‍යවරයා 70 හැවිරිදි වියේ පසුවන අතර ඔහු මේ වන විට ඇල්පිටිය ප්‍රදේශයේ පෞද්ගලික වෛද්‍ය මධ්‍යස්ථානයක් පවත්වාගෙන යනු ලබන බව විමර්ශනවලදී අනාවරණය වී තිබේ.

අනෙක් සැකකරු 30 හැවිරිදි වියේ පසුවන පෞද්ගලික ආයතනයක භාණ්ඩ ප්‍රවාහකයෙකු බවට ද හඳුනාගෙන ඇත.

පිළිගත් වෛද්‍යවරයෙකුගේ නිර්දේශයකින් තොරව මෙම ඖෂධ ඔසුසැල් මගින් ලබා නොදෙන බැවින්, අදාළ වෛද්‍යවරයා සිය නිල හැඳුනුම්පත භාවිත කර මාතර දිස්ත්‍රික්කයේ ඔසුසැල්වලින් මෙම ඖෂධ තොගය මිලදී ගෙන තිබේ.

පසුව ඒවා ඇල්පිටිය ප්‍රදේශයට ගෙන ගොස් වැඩි මිලට අලෙවි කිරීමට සැලසුම් කර තිබූ බව ද මූලික විමර්ශනවලදී අනාවරණය වී ඇත.

අත්අඩංගුවට ගත් සැකකරුවන් දෙදෙනා, ඖෂධ තොගය සහ මෝටර් රථය අද (09) මාතර අධිකරණය වෙත ඉදිරිපත් කිරීමට නියමිතය.