කළු ගඟ ද්‍රෝණියේ කුඩා ගඟ උප ද්‍රෝණිය ආශ්‍රිතව මේ වනවිට සුළු ගංවතුර තත්ත්වයක් වාර්තාවී ඇති බව වාරිමාර්ග දෙපාර්තමේන්තුව පවසයි. 

නිවේදනයක් නිකුත් කරමින් එම දෙපාර්තමේන්තුව ඉල්ලා සිටියේ, බුලත්සිංහල, මදුරාවල සහ පාලින්දනුවර ප්‍රාදේශීය ලේකම් කොට්ඨාසවල කුඩා ගඟ හා මගුර ගඟ පිටාර තැන්නට අයත් පහත්බිම්වල පදිංචි ජනතාව මේ සම්බන්ධයෙන් සැලකිලිමත් වන ලෙසය. 

කෙසේ වෙතත්, දැනට ලැබී ඇති වර්ෂාපතන දත්ත සහ පවතින වර්ෂා රටාව සැලකිල්ලට ගත් විට ඉදිරි පැය කිහිපය තුළ ගංගා ජල මට්ටම්වල සැලකිය යුතු හෝ ශීඝ්‍ර වැඩිවීමක් අපේක්ෂා නොකරන බව ද එහි සඳහන්.