එක් වරක් පමණක් භාවිතා කර ඉවතලන ප්ලාස්ටික් සහ පොලිතින් ජූනි මාසයේ සිට තහනම් කිරීමට කටයුතු කරන බව පරිසර අමාත්‍යංශ ලේකම් අනිල් ජාසිංහ ප්‍රකාශ කරයි.

පරිසර අමාත්‍යාංශය මඟින් අනුරාධපුර ක්‍රියාත්මක කරන සුවදායී භූමිදර්ශන‍ ව්‍යාපෘතිය නිරීක්ෂණය කිරීම සඳහා සහභාගී වූ අවස්ථාවේ මාධ්‍යට අදහස් දක්වමින් ඔහු මේ බව ප්‍රකාශ කළේය.  

මෙරට ප්ලාස්ටික් හා පොලිතීන් අවම කිරීම සඳහා කඩිනම් පියවර ගන්නා බව ඔහු ප්‍රකාශ කළ අතර පොලිතින් මල්මාලා, ප්ලාස්ටික් පිඟන් සහ කෝප්ප, යෝගට් හැඳි ආදී නැවත භාවිතයට නොගන්නා දේ තහනම් කිරීමට කටයුතු කරන බව ඔහු ප්‍රකාශ කළේය.

නමුත් යෝගට් කප් සඳහා මේ වන තෙක් විකල්පයක් නොමැති බැවින් ඒ සඳහා තහනමක් යොදා නොමැති බව ද ඔහු ප්‍රකාශ කළේය.

මෙවැනි ප්ලාස්ටික් නිෂ්පාදන ලාභ මෙන්ම පහසු නිසා මිනිසුන් භාවිතයට හුරු වී ඇති අතර එයින් මෙරට දේශීය නිෂ්පාදකයාට තිබෙන අවස්ථාව අහිමි වී ඇති බවද එහිදී ඔහු වැඩිදුරටත් පැවසීය.