කල් ඉකුත් වූ රූපලාවන්‍ය ආලේපන සහ මිල සඳහන් නොකළ සුවඳ විලවුන් මෙන්ම අවශ්‍ය තොරතුරු රහිත ආලේපන තොගයක් අලෙවි කළ බොරැල්ලේ පිහිටි ආයතනයකට රුපියල් ලක්ෂ 3ක දඩ මුදලක් නියම කර තිබේ.

අදාළ ආයතනයට එරෙහිව පාරිභෝගික කටයුතු අධිකාරිය විසින් චෝදනා තුනකට අදාළව පැවරූ නඩුවකට අදාළව කොළඹ ප්‍රධාන මහේස්ත්‍රාත් අධිකරණය (අංක 5) හමුවේ අදාළ ආයතනයට එරෙහිව මෙම දඩ මුදල නියම කර ඇත.

පසුගිය අගෝස්තු මස 18 වැනි දින පාරිභෝගික කටයුතු පිළිබඳ අධිකාරිය විසින් මේ සම්බන්ධව වැටලීමක් සිදුකර ඇති අතර එහිදී අනාවරණය වී ඇත්තේ අදාළ ආයතනය උපරිම සිල්ලර මිල සඳහන් නොකර සුවඳ විලවුන් අලෙවි කිරීම, කල් ඉකුත් වූ ආලේපන අලෙවියට තැබීම, අවශ්‍ය තොරතුරු රහිතව කල් ඉකුත් වූ ආලේපන අලෙවියට තබා ඇති බවය.

ඒ අනුව මීට අදාළව පාරිභෝගික කටයුතු පිළිබඳ අධිකාරිය විසින් අදාළ ආයතනයට එරෙහිව නඩු පැවරීමට කටයුතු කර ඇති අතර ඒ අනුව අදාළ ආයතනය මෙම චෝදනා සම්බන්ධව අධිකරණය හමුවේ වරද පිළිගෙන තිබේ.

ඒ අනුව අදාළ සමාගමට එරෙහිව රුපියල් ලක්ෂ 3ක දඩ මුදලක් නියම කිරීමට මහේස්ත්‍රාත්වරයා නියම කළේය.