වසරේ ජනවාරි සිට ජූලි මාසය දක්වා විදෙස් ගත ශ්‍රමිකයින්ගෙන් ලැබී ඇති සමස්ත ප්‍රේෂණ ප්‍රමාණය අමෙරිකානු ඩොලර් මිලියන 5,000 ඉක්මවා තිබේ.

මහ බැංකුව විසින් නිකුත් කර ඇති වාර්තාවකට අනුව වසරේ එම කාලය තුළ වාර්තා වී ඇති සමස්ත විදෙස් ප්‍රේෂණ ප්‍රමාණය අමෙරිකානු ඩොලර් මිලියන 5,382.4කි.

එය පසුගිය වසරේ එම කාලය හා සැසඳීමේදී වර්ධනයක් පෙන්නුම් කරන අතර පසුගිය වසරේ ජනවාරි සිට ජූලි මාසය දක්වා වූ කාලය තුළ වාර්තා වී ඇත්තේ අමෙරිකානු ඩොලර් 4,435.2කි.

ඒ අනුව එම වසරේ මුල් මාස 7ට සාපේක්ෂව මෙම වසරේ එම කාලය තුළ ලැබී ඇති විදෙස් ප්‍රේෂණ ප්‍රමාණය අමෙරිකානු ඩොලර් මිලියන 947.2කින් වර්ධනය වී තිබේ.

මේ අතර ජූලි මාසයේදී පමණක් මෙරටට ලැබී ඇති සමස්ත විදෙස් ප්‍රේෂණ ප්‍රමාණය අමෙරිකානු ඩොලර් මිලියන 777.6ක් ලෙසද සටහන් වී ඇත.

එය පසුගිය ජුනි මාසයේ ලැබී ඇති විදෙස් ප්‍රේෂණ ප්‍රමාණය හා සැසඳීමේදී සුළු වර්ධනයක් දක්නට ලැබෙන අතර ජුනි මාසයේදී මෙරටට ලැබුණු විදෙස් ප්‍රේෂණ ප්‍රමාණය 697.3ක් ලෙසද සටහන් වී තිබුණි.

ඒ අනුව ජුනි මාසයට සාපේක්ෂව ජූලි මාසයේදී අමෙරිකානු ඩොලර් මිලියන 80.3ක වර්ධනයක් පෙන්නුම් කරමින් ජූලි මාසය තුළ ඩොලර් මිලියන 777.6ක් වාර්තා වී තිබේ.