වේගයෙන් ඉහළ යන උද්ධමනය පාලනය කර භාණ්ඩ හා සේවාවල මිල ගණන් ස්ථාවර මට්ටමක පවත්වා ගැනීමේ අරමුණින්, අමෙරිකානු මහ බැංකුව වන ෆෙඩරල් සංචිතය (Federal Reserve) විසින් වසර තුනකට වැඩි කාලයකට පසු ප්‍රථම වතාවට සිය පොලී අනුපාතික ඉහළ නැංවීමට තීරණය කර ඇත.

ඒ අනුව, මීට පෙර 3.5% ත් 3.75% ත් අතර මට්ටමක පැවති පොලී අනුපාතිකය 3.75% ත් 4% දක්වා ඉහළ නැංවීමට මහ බැංකු මණ්ඩලයේ එකඟතාව හිමි විය. පොලී අනුපාතික පහත හෙළන ලෙස ජනාධිපති ඩොනල්ඩ් ට්‍රම්ප් දැඩි ලෙස බලපෑම් කර තිබූ පසුබිමක පවා මහ බැංකු මණ්ඩලය ඒකමතිකව මෙම තීරණයට එළඹීම විශේෂත්වයකි.

මේ පිළිබඳව මාධ්‍ය වෙත අදහස් දක්වමින් මහ බැංකු සභාපති කෙවින් වෝර්ෂ් (Kevin Warsh) ප්‍රකාශ කළේ, උද්ධමනය ඉතා ඉහළ අගයක පැවතීම මෙන්ම එය දිගු කාලයක් තිස්සේ නොවනස්ව පැවතීම හේතුවෙන් මෙම වගකීම් සහගත පියවර ගැනීමට සිදු වූ බවයි.

පසුගිය සමයේ අමෙරිකානු-ඊශ්‍රායල යුද්ධය සහ ඉරානය සමඟ ඇති වූ හමුදාමය ගැටුම් හේතුවෙන් ලෝක වෙළෙඳපොළේ තොග තෙල් මිල ඉහළ ගිය අතර, ඒ සමඟම ඉන්ධන මිල ගණන්ද සීඝ්‍රයෙන් ඉහළ ගියේය. මෙහි ප්‍රතිඵලයක් ලෙස අනෙකුත් භාණ්ඩ හා සේවාවල මිල ගණන් ඉහළ ගොස්, උද්ධමනය මහ බැංකුවේ අපේක්ෂිත 2% ඉලක්කයට වඩා වැඩි අගයක වසර පහකටත් වඩා වැඩි කාලයක් පැවතුණි. මෙය මහජනතාවට දැඩි බලපෑමක් එල්ල කළ කරුණක් විය.

කෙසේ වෙතත්, මහ බැංකු ප්‍රධානියාගේ මෙම පියවර ජනාධිපති ඩොනල්ඩ් ට්‍රම්ප්ගේ දැඩි දෝෂදර්ශනයට ලක් විය. පොලී අනුපාතික වහාම අඩු කරන ලෙස ඔහු සමාජ මාධ්‍ය ඔස්සේ දිගින් දිගටම බල කර සිටියේය. මෙම තීරණයෙන් පසුව අදහස් දැක්වූ ජනාධිපතිවරයා කියා සිටියේ, තමන් කෙවින් වෝර්ෂ් කෙරෙහි විශ්වාසය තැබුවද, සමස්ත මහ බැංකු මණ්ඩලය ඉතා දේශපාලනික මෙන්ම සතුරු ලෙස ස්ථාවරයක සිට ක්‍රියා කරන බවයි.