වෛද්‍යවරුන් ඇතුළු වෘත්තීයවේදීන් සඳහා සාධාරණ සහ යුක්තිසහගත බදු ප්‍රතිපත්තියක් හඳුන්වාදීමට රජය කටයුතු කළ යුතු බව රජයේ වෛද්‍ය නිලධාරීන්ගේ සංගමය පවසයි.

එම සංගමය සඳහන් කරනුයේ සමස්ත රාජ්‍ය බදු ආදායමට අහිතකර බලපෑමක් නොවන ආකාරයෙන්, වෛද්‍යවරුන් ඇතුළු වෘත්තීයවේදීන්ට සාධාරණ බදු ප්‍රතිපත්තියක් ක්‍රියාත්මක කිරීම සඳහා විද්‍යාත්මක හා විශ්ලේෂණාත්මක යෝජනා කිහිපයක් මෙවර අයවැය වෙනුවෙන් ජනාධිපතිවරයා වෙත ඉදිරිපත් කිරීමට තම සංගමය කටයුතු කර ඇති බවය.

රටේ අතිශය දුෂ්කර කාලසීමාවන්හිදී රට වෙනුවෙන් සිය වගකීම සහ යුතුකම ඉටු කළ වෛද්‍යවරුන් ඇතුළු වෘත්තීයවේදීන්ට බදු ප්‍රතිපත්තිය සම්බන්ධයෙන් කඩිනම් සහනයක් මෙන්ම සාධාරණත්වයක් හිමිවිය යුතු බව එම සංගමයේ අදහස වී තිබේ.

රජයේ වෛද්‍ය නිලධාරීන්ගේ සංගමය පෙන්වා දෙන්නේ පසුගිය වසරේදී රජය රුපියල් බිලියන 5,400කට අධික බදු ආදායමක් උපයා ඇති බවත් එය මෙරට ඉතිහාසයේ වාර්තා වූ ඉහළම බදු ආදායම ලෙසත්ය.

එමෙන්ම උපයන විට බදු ගෙවීමේ ක්‍රමවේදයේ යම් සංශෝධන සහ සහන ලබාදී තිබියදීත්, 2025 වසරේදී උපයන විට ගෙවීම් බදු ආදායම අපේක්ෂිත ප්‍රමාණයට වඩා සියයට 30කට වැඩි ප්‍රමාණයකින් ඉහළ ගොස් ඇති බවද ඔවුන් පෙන්වා දී තිබේ.

ඔවුන් පෙන්වා දී ඇත්තේ වත්මන් බදු ක්‍රමය යටතේ තම වැටුපෙන් සියයට 36කට ආසන්න ප්‍රමාණයක් සෘජු බදු ලෙස ගෙවීමට සිදුවන බවත්, ඊට අමතරව වක්‍ර බදු ලෙසද විශාල ප්‍රමාණයක් ගෙවීමට සිදුවීම හේතුවෙන් වෛද්‍යවරුන් ඇතුළු වෘත්තීයවේදීන් දැඩි ආර්ථික පීඩනයකට මුහුණ දී සිටින බවත්ය.

මේ තත්ත්වය හමුවේ මෙරට සතු වටිනා මානව සම්පත සහ දැනුම රට තුළ රඳවා ගැනීම සඳහා තිරසාර හා උපායමාර්ගික වැඩපිළිවෙළක් ක්‍රියාත්මක කිරීම අත්‍යවශ්‍ය බවද එම සංගමය අවධාරණය කර තිබේ.

ඔවුන් පවසනුයේ එවැනි වැඩපිළිවෙළක් ක්‍රියාත්මක කිරීමට රජය අපොහොසත් වුවහොත්, ඉදිරියේදී රටේ වටිනා වෘත්තීය මානව සම්පත අහිමි වී ශ්‍රී ලංකාව දැනුම් කාන්තාරයක් බවට පත්වීමේ අවදානමක් පවතින බවය.

ඒ අනුව, රටේ බදු ආදායම ආරක්ෂා කරගනිමින්ම වෛද්‍යවරුන් ඇතුළු වෘත්තීයවේදීන් සඳහා සාධාරණ බදු පරිසරයක් නිර්මාණය කිරීම කඩිනමින් අවශ්‍ය බවද රජයේ වෛද්‍ය නිලධාරීන්ගේ සංගමය සඳහන් කළේය.