පසුගිය වසරට සාපේක්ෂව මෙම වසරේ දී සමස්ත රජයේ පාසල් සංඛ්‍යාව සියයකින් පමණ අඩු වීමට නියමිත බව අධ්‍යාපන හා උසස් අධ්‍යාපන අමාත්‍යාංශයේ අලුත්ම දත්ත අනාවරණය කරයි.

 පසුගිය වසරේ සමස්ත පාසල් සංඛ්‍යාව 10047ක් වූ අතර ඒ ඒ පළාත්වලින් මේ වන විට අමාත්‍යාංශයට ලැබී තිබෙන දත්ත අනුව එම සංඛ්‍යාව දසදහසකට අඩු බව අමාත්‍යාංශ ආරංචි මාර්ග කීවේය. පෙර වසරේ (2024) පැවති පාසල් සංඛ්‍යාව 10076කි.

 සිසුන් අඩු පාසල් වෙනත් පාසල් හා ඒකාබද්ධ කිරීමේ වැඩපිළිවෙළ මීට හේතු වී තිබේ. එලෙස ඒකාබද්ධ කළ හැකි පාසල් තුන්සියයක් පමණ මේ වන විට හඳුනාගෙන තිබෙන බව ද ඉහත ආරංචි මාර්ග කීවේය.

මේ අතර පසුගිය වසරට සාපේක්ෂව මෙම වසරේ දී පහ ශ්‍රේණියේ ශිෂ්‍යත්ව විභාගයට පෙනී සිටි අයදුම්කරුවන් සංඛ්‍යාව දහතුන් දහස් අටසිය හතරකින් අඩු වී තිබේ. තුන් ලක්ෂ තුන්දහස් හයසිය දා හත් දෙනෙක් පසුගිය වසරේ විභාගයට පෙනී සිට ඇති අතර මෙවර පෙනී සිට ඇත්තේ අයදුම්කරුවන් දෙලක්ෂ අසූනව දහස් අටසිය හැටහත් දෙනෙකි.

මෙම සිසුන් පළමු ශ්‍රේණියට ඇතුළත්ව ඇත්තේ 2022 වසරේ දී ය. එම වසරේ දී පළමු ශ්‍රේණියට ඇතුළත් වී ඇති සිසුන් සංඛ්‍යාව දෙලක්ෂ අනූදෙදහස් පන්සිය දාහතකි. ඒ අනුව ද ගත් කල ශිෂ්‍යත්ව විභාගයට පෙනී සිටි අයදුම්කරුවන් සංඛ්‍යාව අනුව දෙදහස් හයසිය පනහකගේ වෙනසක් පවතියි.

ඉකුත් 2021 වසරේ දී ශිෂ්‍යත්ව විභාගයට අයදුම්කරුවන් තුන් ලක්ෂ තිස්පන් දහස් එකසිය පනස් අට දෙනෙක් විභාගයට පෙනී සිට තිබේ.

උසස් පෙළ හා සාමාන්‍ය පෙළ විභාගයන්ට පෙනී සිටින අයදුම්කරුවන් සංඛ්‍යා ද වසරින් වසර අඩු වන බව විභාග දෙපාර්තමේන්තු වාර්තා පෙන්වා දෙයි.