ලොව විශාලතම ක්‍රිප්ටෝ මුදල් හුවමාරු ආයතනයක් වන Binance සමාගමට එල්ල වූ දැවැන්ත සයිබර් ප්‍රහාරයෙන් සොරකම් කරන ලද අමෙරිකානු ඩොලර් බිලියන 6.3ක වත්කම්වලින් 90%කට සමාන වටිනාකමක් නැවත ආවරණය කිරීමට එම සමාගම සමත්ව ඇති බව විදෙස් මාධ්‍ය වාර්තා කරයි.

පසුගිය ඔක්තෝබර් 29 වැනිදා Binance සමාගමේ අන්තර්ජාලයට සම්බන්ධ ක්‍රිප්ටෝ මුදල් පසුම්බි පද්ධතියට එල්ල වූ සයිබර් ප්‍රහාරයකින් අදාළ වත්කම් සොරකම් කර තිබුණි.

ක්‍රිප්ටෝ මුදල් ඉතිහාසයේ වාර්තා වූ විශාලතම සොරකම ලෙස සැලකෙන මෙම සිදුවීමෙන් පසු පරිශීලකයින්ට සිදුවන මූල්‍ය පාඩුව සම්පූර්ණයෙන් ආවරණය කිරීමට Binance සමාගම ප්‍රතිඥා ලබාදී තිබේ.

ඒ අනුව සමාගමේ අරමුදල් සහ ආරක්ෂිත සංචිත භාවිත කරමින් අමෙරිකානු ඩොලර් බිලියන 6.34කට අධික මුදලක් ඒ සඳහා වෙන්කර ඇති අතර, සොරකම් වූ වත්කම්වල වටිනාකමින් 90%කට සමාන ක්‍රිප්ටෝ වත්කම් නැවත සපයා ඇති බව එම සමාගම නිවේදනය කර ඇත.

ඉතිරි 10%ක වත්කම් ප්‍රමාණය ද නැවත සපයා දීමට කටයුතු කරන බවත්, එම වත්කම් වෙළෙඳපොළෙන් ලබාගැනීමේ අපහසුතා හේතුවෙන් ඊට වැඩි කාලයක් ගතවිය හැකි බවත් සමාගම පෙන්වා දී තිබේ.

මේ අතර Binance සමාගමේ සම ප්‍රධාන විධායක නිලධාරී රිචඩ් ටෙන්ග් සඳහන් කර ඇත්තේ සොරකම් වූ වත්කම්වල වටිනාකමින් 90%ක් මේ වනවිට ආවරණය කර ඇති අතර, ඉතිරි 10% ද ආවරණය කිරීමට කැපවී සිටින බවය.

මෙම සයිබර් ප්‍රහාරයෙන් ඇති වූ මූල්‍ය පාඩුව පරිශීලකයින් වෙත පැවරීමට කටයුතු නොකරන බව ද ඔහු අවධාරණය කර තිබේ.

අදාළ සයිබර් ප්‍රහාරය උතුරු කොරියානු රාජ්‍ය අනුග්‍රහය ලබන බවට සැලකෙන TraderTraitor නමැති හැකර් කණ්ඩායම විසින් සිදුකර ඇති බවට අමෙරිකානු ෆෙඩරල් විමර්ශන කාර්යාංශය (FBI) චෝදනා කර ඇතැයි විදෙස් මාධ්‍ය වාර්තා කරයි.

එමෙන්ම බ්ලොක්චේන් තාක්ෂණය පිළිබඳ විශ්ලේෂණ ආයතන කිහිපයක් ද මෙම සයිබර් ප්‍රහාරයට උතුරු කොරියානු හැකර්වරුන් සම්බන්ධ බවට සැක පළකර තිබේ.

ප්‍රහාරය සිදුකළ පිරිස සිය අනන්‍යතාව සහ ක්‍රියාකාරකම් පිළිබඳ සාක්ෂි සැඟවීම සඳහා දියුණු තාක්ෂණික ක්‍රම භාවිත කර ඇති බව ද විමර්ශනවලදී අනාවරණය වී ඇතැයි වාර්තා වේ.

මෙම සොරකම 2025 වසරේ පෙබරවාරි මාසයේදී Bybit ක්‍රිප්ටෝ මුදල් හුවමාරු ආයතනයෙන් අමෙරිකානු ඩොලර් බිලියන 1.5ක වත්කම් සොරකම් කිරීමේ සිද්ධිය ද අභිබවා ගොස් තිබේ.

මේ අතර සයිබර් ප්‍රහාරයෙන් අනතුරුව Binance සමාගම සිය පරිශීලකයින්ගේ මුදල් ආපසු ලබාගැනීමේ සේවාව තාවකාලිකව අත්හිටුවීමට පියවර ගත් අතර, එම සේවාව නොවැම්බර් 01 වැනිදා නැවත ආරම්භ කිරීමට සැලසුම් කර ඇති බව ද විදෙස් මාධ්‍ය වාර්තා කරයි.

2017 වසරේ ආරම්භ කරන ලද Binance සමාගම ලොව ප්‍රමුඛතම ක්‍රිප්ටෝ මුදල් හුවමාරු වේදිකාවක් වන අතර, එමගින් ලොව පුරා මිලියන සංඛ්‍යාත පරිශීලකයින්ට ඩිජිටල් වත්කම් මිලදී ගැනීම, විකිණීම සහ හුවමාරු කිරීමේ පහසුකම් සපයයි.