නුවරඑළිය ග්‍රෙගරි වැවේ ජල දූෂණය පාලනයට කඩිනම් ඒකාබද්ධ වැඩපිළිවලක් ක්‍රියාත්මක කිරීම සඳහා අවධානය යොමුව තිබේ.

ඒ අනුව මේ සම්බන්ධව නිරීක්ෂණය කිරීම සඳහා පරිසර නියෝජ්‍ය අමාත්‍ය ඇන්ටන් ජයකොඩි මහතා ප්‍රමුඛ කණ්ඩායමක් සමගින් නුවරඑලිය දිස්ත්‍රික් ලේකම් කාර්යාලයේදී විශේෂ සාකච්ඡාවක් පවත්වා තිබේ.

මෙහිදී නාවික හමුදාව, මධ්‍යම පරිසර අධිකාරිය, නුවරඑළිය මහ නගර සභාව සහ දිස්ත්‍රික් ලේකම් කාර්යාලය ඇතුළු පාර්ශ්වයන්ගේ සහභාගීත්වයෙන් කළමනාකරණ කමිටුවක් පත්කර කෙටි කාලීන විසඳුම් ඇතුළත් කඩිනම් යෝජනාවලියක් සකස් කර ක්‍රියාත්මක කිරීම සඳහාත්, කෘෂිකාර්මික අපද්‍රව්‍ය හා නගරයේ අපජලය වැවට එක්වීමට පෙර ස්වභාවිකව පිරිපහදු වන පොකුණු 13ක පද්ධතිය නැවත සක්‍රීය කිරීම සඳහාත් තීරණය වී ඇත.

තවද ස්වභාවික වාතනය ඉහළ නංවා ස්වාභාවික පෙරණ ක්‍රම මගින් ජලයේ දුර්ගන්ධය ඉවත් කර නයිට්‍රජන් සහ පොස්පරස් වැනි සාන්ද්‍රණයන් අවම කිරීමටත්, නුවරඑළිය නගරයේ මලාපවහන පද්ධතිය සහ අනෙකුත් අපද්‍රව්‍ය වැවට එක්විම වැලැක්වීම සඳහා වන දීර්ඝ කාලීන ව්‍යාපෘති යෝජනා කඩිනමින් සැකසීම සඳහාත් මෙහිදී යෝජනා වී තිබේ.

මේ සඳහා සියලු රාජ්‍ය ආයතනවල පූර්ණ සම්බන්ධීකරණයෙන් යුතුව කඩිනමින් ක්‍රියාත්මක කිරීම සඳහා කටයුතු කරන අතර ග්‍රෙගරි වැව පරිශ්‍රය ආරක්ෂා කරගනිමින් සංචාරක ආකර්ෂණය සුරැකෙන පරිදි කෙටි කාලීන හා දීර්ඝ කාලීන විසඳුම් සමගින් මෙම කටයුතු ක්‍රියාත්මක කිරීම සඳහාද අවධානය යොමුව ඇත.