මැදපෙරදිග ස්ථාපිත ඇමෙරිකානු බලඇණි ඉලක්ක කරගනිමින් ඉරානය එල්ල කිරීමට තැත් කළ හදිසි ප්‍රහාරවලට පිළිතුරු වශයෙන්, ඉරානය වෙත ප්‍රබල මෙන්ම විශාල මට්ටමේ ප්‍රහාර මාලාවක් එල්ල කළ බව ඇමෙරිකානු ආරක්ෂක අංශ තහවුරු කරයි.

ඇමෙරිකානු මධ්‍යම අණදෙන මධ්‍යස්ථානය (Centcom) 'X' පණිවුඩයක් නිකුත් කරමින් කියා සිටියේ, පසුගිය අඟහරුවාදා දිනයේ ජෝර්දානයේ පිහිටි ඇමෙරිකානු හමුදා කඳවුරුවලට සහ හෝමුස් සමුද්‍ර සන්ධියේ ගමන් ගත් නාවික යාත්‍රාවලට ඉරානය එල්ල කළ ප්‍රහාරවලට ප්‍රතිචාර ලෙස මෙම දැඩි ප්‍රහාරාත්මක ක්‍රියාමාර්ගය ගත් බවයි.

ඉරාකයේ සක්‍රියව සිටින ඉරාන හිතවාදී සන්නද්ධ කණ්ඩායම් වෙත ඇමෙරිකාව සහ සෞදි අරාබිය එක්ව ඒකාබද්ධ ප්‍රහාර මාලාවක් එල්ල කර පැය 24ක් යන්නට මත්තෙන් මෙම නවතම උණුසුම් තත්ත්වය නිර්මාණය විය.

පසුගිය පෙබරවාරි මාසයේදී ඇමෙරිකාව සහ ඊශ්‍රායලය එක්ව ඉරානයට එරෙහි හමුදා ක්‍රියාමාර්ග ආරම්භ කළ අවස්ථාවේදී, මෙම සටන සති කිහිපයකින් අවසන් කිරීමට හැකිවනු ඇතැයි ඇමෙරිකානු ජනාධිපති ඩොනල්ඩ් ට්‍රම්ප් විශ්වාසය පළ කර තිබුණි.

නමුත් කිසිදු නිමාවක් නොපෙනෙන පසුබිමක, මෙම යුදමය තත්ත්වය මේ වන විට මාස පහක් පුරා ඇදී යමින් පවතී.

දෙපාර්ශ්වය අතර දින කිහිපයක් පැවැති තාවකාලික නිශ්ශබ්දතාවයෙන් අනතුරුව මෙම ගැටුම් නැවතත් උච්චතම අවස්ථාවට පැමිණ ඇත. එම දින කිහිපය තුළ ප්‍රහාර තාවකාලිකව නවත්වා රාජ්‍යතාන්ත්‍රික මට්ටමේ සාකච්ඡා සඳහා යොමු වන බවක් පෙන්නුම් කළේය.

ජනාධිපති ට්‍රම්ප් එම සාකච්ඡා "ඉතා සුහදශීලී සංවාද" ලෙස අර්ථකථනය කළද, ටෙහෙරාන් පාලනය කියා සිටියේ එවැනි කිසිදු සාකච්ඡාවක් සිදුව නොමැති බවයි.