විශ්වවිද්‍යාල සහ උසස් අධ්‍යාපන ආයතනවල ඉගෙනුම ලබන විශේෂ අවශ්‍යතා සහිත අඩු ආදායම්ලාභීන්ගේ පවුල්වල සිසුන්ට මහපොළ දීමනාවට අමතරව රුපියල් පන්දහසක දීමනාවක් ලබාදීමට විශ්වවිද්‍යාල ප්‍රතිපාදන කොමිෂන් සභාව තීරණය කර තිබේ. මෙම දීමනාව ලබා ගත හැකි වන්නේ වසරකට රුපියල් ලක්ෂ පහකට වඩා අඩු ආදායමක් ලබන පවුල්වල සිසුන්ට ය.

මහපොළ සහ ශිෂ්‍යාධාර දීමනා ගෙවීමේ දී අනුගමනය කරන අනෙකුත් කොන්දේසි මෙම දීමනාව වෙනුවෙන් ද අනුගමනය කෙරෙන බව කොමිෂන් සභාව චක්‍රලේඛයක් මගින් උපකුලපතිවරුන්ට දැනුම් දී ඇත. විශ්වවිද්‍යාලවල පවතින මුදල්වලින් මෙම දීමනාව ලබාදෙන ලෙසත් එම මුදල මාසිකව පියවන බවත් එහි සඳහන් වෙයි.

මෙම වසරේ ජනවාරි මස සිට බලපැවැත්වෙන පරිදි මෙම වැඩපිළිවෙළ ක්‍රියාත්මක කෙරෙන අතර මේ සඳහා අයැදුම් කරන සිසුන් අනිවාර්යයෙන් ම අභ්‍යන්තර සිසුන් විය යුතු ය.

තවද මහපොළ දීමනාව රුපියල් දසදහස දක්වා ද ශිෂ්‍යාධාර දීමනාව රුපියල් නවදහස දක්වා ද මේ වන විට වැඩිකර ඇත.