වෛද්‍ය කාණ්ඩ අතර ගැටුම් ඇති කරමින් වෛද්‍ය සේවාව හා නිදහස් සෞඛ්‍ය පද්ධතිය අර්බුදයකට රැගෙන යාමේ උත්සාහයක් සම්බන්ධව රජයේ වෛද්‍ය නිලධාරීන්ගේ සංගමය චෝදනා කර තිබේ.

එම සංගමය සඳහන් කරනුයේ විශේෂඥ වෛද්‍යවරුන් සහ අනෙකුත් වෛද්‍ය කාණ්ඩ අතර බෙදීමක් ඇති කිරීමේ දේශපාලන ක්‍රියාකාරකමක් මේ වන විට නිර්මාණය වී ඇති බවය.

රටේ පැවැති ආර්ථික, සමාජ හා දේශපාලනික අස්ථාවරත්වය හමුවේ විශේෂඥ වෛද්‍යවරුන් ඇතුළු වෛද්‍යවරුන් රට තුළ රඳවා ගැනීම ගැටලුවක් වූ බවත් එම ගැටලුවට විසඳුම් සෙවීම සඳහා සෞඛ්‍ය අමාත්‍යාංශය සහ වෛද්‍ය වෘත්තීය සංගම් ඇතුළු පාර්ශ්වකරුවන්ගෙන් සමන්විත කමිටුවත් පත් කළ බවත් පෙන්වා දෙන එම සංගමය එහිදි සියලුම කාණ්ඩ රට තුළ රඳවා ගැනීම සඳහා "ශ්‍රී ලංකා වෛද්‍ය සේවය" නමින් නව සේවා කාණ්ඩයක් සහ වැටුප් ව්‍යුහයක් ස්ථාපිත කිරීමට එකඟ වූ බවද සඳහන් කර තිබේ.

ඒ අනුව 2026 අයවැය තෙවනවර කියවීමේදී විශේෂඥ වෛද්‍යවරුන් ඇතුළු සියලුම වෛද්‍යවරුන් රට තුළ රඳවා ගැනීම සඳහා වෙනම සේවා කාණ්ඩයක් ස්ථාපිත කරන බවට සහතික වූ බවත් එම සංගමය සඳහන් කළේය.

කෙසේ වෙතත් විශේෂඥ වෛද්‍යවරුන් සඳහා පමණක් වෙනම සේවා කාණ්ඩයක් ස්ථාපිත කිරීමේ යෝජනාවක් ඉදිරිපත්ව ඇති බවත් එමගින් වෛද්‍ය කාණ්ඩ අතර බෙදීමක් ඇතිවීමේ අවදානමක් පවතින බවද එම රජයේ වෛද්‍ය නිලධාරීන්ගේ සංගමය පෙන්වා දී තිබේ.

ඒ අනුව එක් කාණ්ඩයක් සඳහා පමණක් වෙනම සේවා ව්‍යවස්ථාවක් ස්ථාපිත කිරීමෙන් නිදහස් සෞඛ්‍ය සේවාවට සහ රෝගී සත්කාර සේවාට සිදුවිය හැකි බලපෑම සලකා එම යෝජනාවට තම සංගමය එකඟ නොවන බවද රජයේ වෛද්‍ය නිලදාරීන්ගේ සංගමය සඳහන් කළේය.

ඔවුන් පවසනුයේ මේ සම්බන්ධව තම වාචික හා ලිඛිත අදහස් අදාළ කමිටුව වෙත ඉදිරිපත් කර ඇති බවත් එම සංගමය විසින් කමිටු වාර්තාවේ පිටපතක් ලබා දෙන ලෙස අවස්ථා කිහිපයකදී අදාළ බලධාරීන්ගෙන් ඉල්ලා තිබුණද මෙතෙක් එය ලබා දී නොමැති බවය.

මේ හේතුවෙන් ඉදිරි ක්‍රියාමාර්ග පිළිබඳව සුදුසු තීරණ ගැනීම සඳහා සංගමයේ පළාත් සහ දිස්ත්‍රික් සම්බන්ධීකාරකවරුන්ගේ හදිසි රැස්වීමක් පසුගිය 28 වැනිදා පැවති බවත් ඒ අනුව රජයේ වෛද්‍ය නිලධාරීන් සංගමයේ විශේෂඥ වෛද්‍යවරුන්ගේ අනුකමිටු හදිසි රැස්වීමක් හෙට (31) පැවැත්වීමට නියමිතව ඇති බවත් එම සංගමය සඳහන් කර තිබේ.

ඒ අනුව හෙට දිනයේදී මේ සම්බන්ධව ඉදිරි ක්‍රියාමාර්ග ගැනීමට නියමිත බව පෙන්වා දෙන රජයේ වෛද්‍ය නිලධාරීන්ගේ සංගමය පැවසුවේ වෛද්‍යවරුන්ගේ අයිතිවාසිකම් හා වරප්‍රසාද ආරක්ෂා කර ගනිමින් එකමුතුව, කණ්ඩායම් හැඟීමෙන් යුතුව සේවය කළ හැකි ශ්‍රී ලංකා වෛද්‍ය සේවය බිහි කිරීම සඳහා ගත යුතු ඉදිරි තීරණාත්මක පියවරන් මෙම සාකච්ඡාවේදී ගන්නා බවය.