මෙම නව චක්‍රලේඛය අනුව පාසලේ ලාංඡනය භාවිත කරමින් ආදි ශිෂ්‍ය සංගම් ඇතුළු පාසලට සම්බන්ධ ආයතනයක් මගින් පවත්වන ක්‍රිකට් තරගයක් හෝ යම් උත්සවයකදී මත්ද්‍රව්‍ය ප්‍රචාරය කිරීම, මත්ද්‍රව්‍ය භාවිත කිරීම සිදුකළහොත්, එම තරගය හෝ උත්සවය වහාම තහනම් කිරීමට අධ්‍යාපන අමාත්‍යාංශයේ ලේකම්වරයාට බලය හිමිවී තිබේ.

‘‘ප්‍රධාන පාසල්වල ක්‍රියාත්මකවන මහා ක්‍රිකට් ගැටුම්වලදී දරුවන් මත්ද්‍රව්‍යවලට යොමුවූ බවට දෙමාපියන්ගෙන් චෝදනා එල්ල වී තිබෙනවා. අධ්‍යාපන අමාත්‍යාංශය මගින් නිකුත් කරන ලද 2026/10 දරන චක්‍රලේඛය මගින් පාසල නියෝජනය කරන එනම් පාසලේ ලාංඡනය භාවිත කරන කිසිදු වැඩසටහනකදී මත්ද්‍රව්‍ය ප්‍රචාරය කිරීම, මත්ද්‍රව්‍ය යොදා ගැනීම සම්පූර්ණයෙන්ම තහනම් කර තිබෙනවා. එය දැඩිව අධීක්ෂණය කරනවා.’’ යැයි අධ්‍යාපන උසස් අධ්‍යාපන සහ වෘත්තීය අධ්‍යාපන අමාත්‍යාංශයේ නියෝජ්‍ය අධ්‍යක්ෂ (විෂය සමගාමී මාර්ගෝපදේශන හා උපදේශන ශාඛාව) මහේෂ් රත්නායක සඳහන් කළේය.

‘‘පාසලේ ලාංඡනය භාවිත කරමින් යම් උත්සවයක් හෝ වැඩසටහනක් පවත්වන්නේ නම් එය පාසලේ උත්සවයක් වෙනවා. එම නිසා පාසලේ ලාංඡනය භාවිත කරමින් පවත්වන කිසිදු උත්සවයකදී මත්පැන්, මත්ද්‍රව්‍ය හෝ කිසිදු ආකාරයක මත්වීමේ ද්‍රව්‍යයක් මින් ඉදිරියට භාවිත නොකළ යුතු බව ආදි ශිෂ්‍ය සංගම් ඇතුළු පාසල්වලට සම්බන්ධ සියලු ආයතනවලට සහ එහි සාමාජිකයන්ට මතක් කර සිටිනවා. මින් ඉදිරියට පාසලේ ලාංඡනය සහිත උත්සවයකදී මත්ද්‍රව්‍ය, මත්පැන් භාවිත කළහොත් එම උත්සවය වහාම තහනම් කිරීමට නව චක්‍රලේඛය අනුව අධ්‍යාපන ලේකම්වරයාට බලය තිබෙනවා.’’ යැයි නියෝජ්‍ය අධ්‍යක්ෂ මහේෂ් රත්නායක වැඩිදුරටත් පැවසීය.

කොළඹ 07 විජේරාම මාවතේ පිහිටි රටම එකට ජාතික මෙහෙයුම ප්‍රධාන කාර්යාලයේ පැවැති පාසල් සඳහා ක්‍රියාත්මක කරන මත්ද්‍රව්‍ය නිවාරණ විශේෂ ව්‍යාපෘතිය පිළිබඳ දැනුවත් කිරීමේ මාධ්‍ය හමුවට එක්වෙමින් අධ්‍යාපන අමාත්‍යාංශයේ නියෝජ්‍ය අධ්‍යක්ෂ මහේෂ් රත්නායක එලෙස පැවසීය.