වටිනා තෑගි පාර්සලයක් ලබාදෙන බව පවසා වට්ස්ඇප් සමූහය මගින් රුපියල් 1,455,000ක මුදලක් වංචා කිරීමේ සිද්ධියක් සම්බන්ධයෙන් සැකකාරියක් අත්අඩංගුවට ගෙන තිබේ.

මේ සම්බන්ධයෙන් පරිගණක අපරාධ විමර්ශන අංශයේ වයඹ පළාත් ඒකකය වෙත ලද පැමිණිල්ලක් මත විමර්ශන සිදු කෙරුණු අතර එහිදී සැකකාරියගේ ගිණුම වෙත අදාළ මුදල් බැරකරවා ගෙන මුදල් වංචා කිරීම සම්බන්ධයෙන් චෝදනා එල්ලවී තිබුණි.

ඒ අනුව ඊයේ (30) දින උදෑසන කටුනායක ගුවන්තොටුපොළ මගී පර්යන්තයේදී ඉහත වංචා කිරීමට සම්බන්ධ සැකකාරිය විමර්ශන නිලධාරීන් විසින් අත්අඩංගුවට ගෙන ඇත.

සැකකාරිය අවුරුදු 46ක් වන නුගේගොඩ ප්‍රදේශයේ පදිංචිකාරියකි.

පරිගණක අපරාධ විමර්ශන අංශයේ වයඹ පළාත් ඒකකය විසින් සිද්ධිය සම්බන්ධයෙන් වැඩිදුර විමර්ශන සිදුකරයි.