මැයි මාසය තුළ සංචාරකයින් 145,745 දෙනෙකු මෙරටට පැමිණ ඇති බව ශ්‍රී ලංකා සංචාරක සංවර්ධන අධිකාරිය පවසයි.

එය 2025 මැයි මාසයේ වාර්තා වූ සංචාරක පැමිණීම් 132,919ට සාපේක්ෂව සියයට 9.65ක වර්ධනයක් වන අතර, 2018 මැයි මාසයේ වාර්තා වූ 129,466ට සාපේක්ෂව සියයට 12.6ක වර්ධනයක් ලෙසද සටහන් වී තිබේ.

නවතම සංඛ්‍යාලේඛන අනුව, මැයි මාසයේදී වැඩිම සංචාරකයින් පිරිසක් පැමිණ ඇත්තේ ඉන්දියාවෙන් වන අතර, එම සංඛ්‍යාව 60,342කි. එය සමස්ත සංචාරක පැමිණීම්වලින් සියයට 41ක් වෙයි.

එමෙන්ම, එක්සත් රාජධානියෙන් සංචාරකයින් 9,248ක්, චීනයෙන් 9,156ක්, ජර්මනියෙන් 6,734ක් සහ ඔස්ට්‍රේලියාවෙන් 6,414ක් මෙරටට පැමිණ ඇති බව ද වාර්තා වේ.

මේ අතර, 2026 ජනවාරි 01 සිට මැයි 31 දක්වා කාලය තුළ ශ්‍රී ලංකාවට පැමිණ ඇති සමස්ත සංචාරකයින් සංඛ්‍යාව 1,022,022ක් දක්වා ඉහළ ගොස් තිබේ.

එම කාලය තුළ ඉන්දියාවෙන් සංචාරකයින් 250,260ක්, එක්සත් රාජධානියෙන් 98,093ක් සහ රුසියාවෙන් 76,073ක් පැමිණ ඇති බව ශ්‍රී ලංකා සංචාරක සංවර්ධන අධිකාරිය වැඩිදුරටත් පැවසීය.