මෙවර මහ කන්නයේ (2024/25) වී අස්වනු මිල දී ගැනීමට අදාළව ඒ ඒ වී වර්ගය අනුව රුපියල් 105 ත් 130 ත් අතර “සහතික මිල’’ක් රජය තීරණය කර ඇතැයි මුදල් අමාත්‍යාංශ ආරංචිමාර්ග සඳහන් කරයි.

ඒ අනුව රතුනාඩු වී කිලෝවක් රුපියල් 105 බැගින් ද, සුදු නාඩු වී කිලෝවක් රුපියල් 115 බැගින් ද, සම්බා වී කිලෝවක් රුපියල් 120 බැගින් ද, කීරි සම්බා වී කිලෝවක් රුපියල් 130 බැගින් ද මිල දී ගැනීමට නියමිත බව එම ආරංචිමාර්ග කියයි. කෙසේ නමුත් දිවයිනේ බොහෝ ප්‍රදේශවල තෙත වී කිලෝවක මිල රුපියල් 118 ක් දක්වා ද, තෙතමනය රහිත නාඩු වී කිලෝවක මිල රුපියල් 145 ක් දක්වා ද ඉහළ ගොස් ඇති බවට තොරතුරු අනාවරණය වේ. මහ කන්නයේ අස්වනු මෝල් හිමියන් මේ වනවිට මිල දී ගැනීම ආරම්භ කර ඇතැයිද පැවැසේ. ගොවීන් කියා සිටින්නේ අවම වශයෙන් වියළි වී කිලෝවක් සඳහා රුපියල් 140 ක සහතික මිලක් අවශ්‍ය බව ය. රතු නාඩු සහ සුදු නාඩු ලෙස රජය සහතික මිලක් නියම කර ඇත්තේ ඉතිහාසයේ පළමුවරට බව සුළු හා මධ්‍ය පරිමාණ සහල් මෝල් හිමියෝ කියා සිටිති.

සුදු සහ රතු නාඩුවලට මෙලෙස වෙන් වෙන් වශයෙන් මිල ගණන් තීරණය කිරීම නිසා ගොවීන් සුදු නාඩු පමණක් වගා කිරීමට පෙලඹෙන බව ද සුළු හා මධ්‍ය පරිමාණ සහල් මෝල් හිමියෝ පවසති. වී සඳහා තීරණය කරන ලද සහතික මිල හෙට (13 වැනිදා) පැවැත්වෙන කැබිනට් මණ්ඩලයට ඉදිරිපත් කර අනුමැතිය ලබාගැනීමට නියමිත බව ද රජයේ ආරංචිමාර්ග කියයි.

මේ අතර මෙවර මහ කන්නයේ වී අස්වනු මිල දී ගැනීම සඳහා සුළු හා මධ්‍ය පරිමාණ වී මෝල් හිමියන්ට සහ සමුපකාර සමිතිවලට සියයට 7 ක වාර්ෂික පොලී අනුපාතය යටතේ රුපියල් මිලියන 50ක උපරිමයකට යටත්ව ණය මුදලක් පෞද්ගලික හා රාජ්‍ය බැංකු හරහා ලබාදීමට කටයුතු යොදා ඇත. මෙම ණය යෝජනා ක්‍රමය යටතේ බැංකුවලට නිදහස් කිරීමට නියමිත සමස්ථ ණය මුදල රුපියල් මිලියන 10,000 ක් බව සංවර්ධන මූල්‍ය දෙපාර්තමේන්තුව සඳහන් කරයි. මෙලෙස ණය මුදල් ලබාදීම ඉකුත් 03 වැනිදා සිට මැයි මස 15 වැනිදා තෙක් ක්‍රියාත්මකය. අදාළ ණය මුදල දින 180 ක කාලයක් තුළදී ගෙවා අවසන් කළ යුතුය.