2026 වසරේ සැප්තැම්බර් 30 වන විට දේශීය ආදායම් දෙපාර්තමේන්තුව සිය ආදායම් රැස්කිරීම රු. ට්‍රිලියන 2 සීමාව ඉක්මවා යාමට සමත් වී ඇති බව පවසයි.

ඒ අනුව, මේ වසරේ ජනවාරි 1 සිට සැප්තැම්බර් 30 දක්වා කාලය තුළ දෙපාර්තමේන්තුව රැස්කර ඇති සමස්ත ආදායම රුපියල් බිලියන 2,040කි.

2025 වසරේ එම කාලය තුළ රැස්කර තිබූ රුපියල් බිලියන 1,642ක ආදායමට සාපේක්ෂව මෙය රුපියල් බිලියන 398ක වැඩිවීමකි.

2026 වසර සඳහා දේශීය ආදායම් දෙපාර්තමේන්තුවේ වාර්ෂික ආදායම් ඇස්තමේන්තුව රුපියල් බිලියන 2,401ක් වන අතර, සැප්තැම්බර් 30 වනවිට එහි සියයට 85ක ප්‍රමාණයක් සපුරා තිබේ.

මේ අතර, සැප්තැම්බර් මාසය තුළ පමණක් රුපියල් බිලියන 288ක ආදායමක් රැස්කර ඇති අතර, එය පසුගිය වසරේ සැප්තැම්බර් මාසයේ රුපියල් බිලියන 216ක ආදායමට සාපේක්ෂව රුපියල් බිලියන 72ක වැඩිවීමකි.

දේශීය ආදායම් දෙපාර්තමේන්තුව පවසන්නේ බදු ගෙවන්නන්ගේ ස්වේච්ඡා බදු ගෙවීම සඳහා වූ පෙළඹවීම සහ බදු පරිපාලනයේ කාර්යක්ෂමතාව මෙම ආදායම් වර්ධනයට දායක වී ඇති බවයි.