ශ්‍රී ලංකා තොරතුරු තාක්ෂණ ආයතනයේ (SLIIT) මානව ශාස්ත්‍ර හා විද්‍යා පීඨයට අනුබද්ධ ව්‍යවහාරික විද්‍යා දෙපාර්තමේන්තුව විසින් සංවිධානය කරන ලද 'SciFest 2026' වාර්ෂික විද්‍යා උළෙල 2026 ජූනි 5 වන දින මාලබේ SLIIT පරිශ්‍රයේදී සාර්ථකව පවත්වන ලදී. පාසල් සහ විශ්වවිද්‍යාල සිසුන් තුළ විද්‍යාව, නවෝත්පාදනය සහ ව්‍යවසායකත්වය පිළිබඳ උනන්දුවක් ඇති කරමින්, සැබෑ ලෝකයේ ගැටලුවලට ප්‍රායෝගික විසඳුම් සෙවීම සඳහා ඔවුන්ව දිරිගැන්වීමේ අරමුණින් මෙම උළෙල සැලසුම් කර තිබුණි.

සිව්වන වරටත් පැවැත්වුණු මෙම 'SciFest' විද්‍යා උළෙල සඳහා පාසල් සිසුන්, විශ්වවිද්‍යාල උපාධි අපේක්ෂකයින්, විද්වතුන්, ක්ෂේත්‍රයේ ප්‍රවීණයන් සහ හවුල්කාර ආයතන නියෝජනය කරමින් 300කට ආසන්න පිරිසක් සහභාගී වූහ. අධ්‍යාපන අමාත්‍යාංශය සමඟ ඒකාබද්ධව සංවිධානය කරන ලද මෙම සුවිශේෂී වැඩසටහන මඟින් විද්‍යා අධ්‍යාපනය ප්‍රවර්ධනය කිරීමට, නවෝත්පාදන දිරිගැන්වීමට සහ ශාස්ත්‍රීය ක්ෂේත්‍රය හා කර්මාන්ත ක්ෂේත්‍රය අතර පවතින සබඳතා ශක්තිමත් කිරීමට SLIIT ආයතනය සතු අඛණ්ඩ වෘත්තීය කැපවීම මැනවින් ප්‍රදර්ශනය විය.

මෙම අවස්ථාවෙහි ප්‍රධාන ආරාධිත අමුත්තා සහ ප්‍රධාන දේශක ලෙස මොරටුව විශ්වවිද්‍යාලයේ තාක්ෂණ ආයතනයේ ජ්‍යෙෂ්ඨ කථිකාචාර්ය ආචාර්ය රුචිර විජේසේන මහතා සහභාගී විය. මීට අමතරව, SLIIT ආයතනයේ කුලපති සහ සභාපති මහාචාර්ය ලක්ෂ්මන් රත්නායක, ජ්‍යෙෂ්ඨ නියෝජ්‍ය උපකුලපති මහාචාර්ය නිමල් රාජපක්ෂ, මානව ශාස්ත්‍ර හා විද්‍යා පීඨයේ නියෝජ්‍ය උපකුලපති ආචාර්ය මලිත විජේසුන්දර, ඉංජිනේරු පීඨයේ පීඨාධිපති මහාචාර්ය අයන්ත ගෝමස්, අධ්‍යයන සංවර්ධන හා ගුණාත්මකභාවය සහතික කිරීමේ පීඨාධිපති මහාචාර්ය කොලින් එන්. පීරිස් සහ ව්‍යවහාරික විද්‍යා දෙපාර්තමේන්තුවේ හිටපු ප්‍රධානී මහාචාර්ය ශ්‍රියාණි එන්. පීරිස් යන මහත්ම මහත්මීහු ඇතුළු සම්භාවනීය අමුත්තන් රැසක් මෙම අවස්ථාවට එක්ව සිටියහ.

තරඟාවලියේ විනිශ්චය මණ්ඩලය ක්ෂේත්‍රයේ සහ ශාස්ත්‍රීය අංශයේ පිළිගත් ප්‍රවීණයන්ගෙන් සමන්විත වූ අතර, ඒ සඳහා Lassana සමූහ ව්‍යාපාරයේ සභාපති ආචාර්ය ලසන්ත මලවිගේ, SLIIT Innovate ආයතනයේ අධ්‍යක්ෂ ආචාර්ය දිලාන් ප්‍රනාන්දු, Hatch Works (Pvt) Ltd ආයතනයේ වැඩසටහන් ප්‍රධානී නිරේෂ් රත්නගෝපාල්, Dilmah Conservation & Sustainability කළමනාකරු රිෂාන් සම්පත් යන මහත්වරුන් මෙන්ම SLIIT ආයතනය නියෝජනය කරමින් මහාචාර්ය එරංග විජේසිංහ සහ මහාචාර්ය නතාලි සිල්වා යන මහත්ම මහත්මීහු දායක වූහ.

මෙහිදී පැවැත්වුණු විද්‍යා දැනුම මිනුම තරඟාවලිය මඟින් සිසුන්ගේ දැනුම විවිධ විෂය ක්ෂේත්‍රයන් තුළින් පරීක්ෂාවට ලක් කෙරිණි. දිවයිනේ පළාත් පහක් නියෝජනය කරමින් සහභාගී වූ පාසල් 30ක් අතුරින් අවසන් මහා තරඟ වටයට තේරී පත් වූ පාසල් හතරක් SLIIT පරිශ්‍රයේදී සජීවීව තරඟ වැදුණි. එහිදී කුරුණෑගල විශ්වෝද විද්‍යාලය සමස්ත ලංකා ශූරතාව දිනාගත් අතර, කෑගල්ල ශාන්ත මරියා විද්‍යාලය සහ මාලබේ පිරිමි ආදර්ශ විද්‍යාලය පිළිවෙලින් ප්‍රථම අනුශූරතාවය සහ දෙවන අනුශූරතාවය දිනා ගැනීමට සමත් විය.

මීට සමගාමීව පැවැත්වුණු 'IGNITE' නවෝත්පාදන තරඟාවලිය සඳහා පාසල් සහ විශ්වවිද්‍යාල කාණ්ඩ යටතේ තරඟකරුවන් 80කට ආසන්න පිරිසක් සහභාගී වූ අතර, වාණිජමය වශයෙන් සාර්ථක කළ හැකි හැකි විද්‍යාත්මක විසඳුම් ඉදිරිපත් කිරීමට ඔවුන්ව දිරිමත් කරනු ලැබීය. එහි විශ්වවිද්‍යාල කාණ්ඩයේ ප්‍රථම ස්ථානය, සංඥා භාෂාව සන්නිවේදනය සඳහා පරිවර්තනය කළ හැකි සුවිශේෂී අත්වැසුමක් නිර්මාණය කළ දිනෙත් ශාවින්ද සමරකෝන්ගේ නායකත්වයෙන් යුත් SLIIT ආයතනයේ 'Team SilenceSpeak' කණ්ඩායම විසින් දිනා ගන්නා ලදී. පාසල් කාණ්ඩයේ ප්‍රථම ස්ථානය ඩෙංගු මදුරු කීටයන් කල්තියා හඳුනාගැනීමේ නවීන තාක්ෂණික ව්‍යාපෘතියක් ඉදිරිපත් කළ ගම්පහ යශෝධරා දේවි බාලිකා විද්‍යාලයේ එච්. පී. දුල්ජා සනුලි කරුණාසේකර ශිෂ්‍යාව විසින් හිමිකර ගන්නා ලදී.

මෙම ප්‍රශංසනීය ප්‍රයත්නය පිළිබඳව වෘත්තීයමය අදහස් දක්වමින් මානව ශාස්ත්‍ර හා විද්‍යා පීඨයේ නියෝජ්‍ය උපකුලපති ආචාර්ය මලිත විජේසුන්දර මහතා මෙසේ ප්‍රකාශ කළේය: SciFest 2026 විද්‍යා උළෙල නිර්මාණය කළේ අපේ තරුණ පරපුරට විද්‍යාව කියන්නේ පන්ති කාමරයේ පෙළපොතට පමණක් සීමා වූවක් නොවන බව ප්‍රායෝගිකව පෙන්වා දීමටයි. න්‍යායාත්මක දැනුම, නිර්මාණශීලිත්වය සහ ව්‍යවසායකත්ව අභිලාෂයන් එකට මුසු කිරීම තුළින් සිසුන් තුළ විචාරාත්මක චින්තනය වර්ධනය කිරීමටත්, රටට අවශ්‍ය ප්‍රායෝගික විසඳුම් බිහි කිරීමටත්, එම නවෝත්පාදනයන් ජාතික ආර්ථිකයේ සහ සමාජයේ ප්‍රගතියට සෘජුවම දායක වන ආකාරය පිළිබඳව මනා අවබෝධයක් ලබා දීමටත් අප බලාපොරොත්තු වෙනවා."

මෙවර 'SciFest 2026' විද්‍යා උළෙල සඳහා ප්‍රධාන අනුග්‍රාහකත්වය ALTHIA සහ AVON Pharmo Chem යන ආයතන විසින් ලබා දුන් අතර, ප්‍රමුඛතම සහකරු ලෙස U & P Global Tec ආයතනය කටයුතු කළේය. මීට අමතරව LifeCare Biotech, CeyDev, P&T සහ Hemsons යන ආයතන ද මේ සඳහා සිය ආයතනික දායකත්වය සහ සහයෝගීතාව දක්වන ලදී.

තරඟාවලියේ ජයග්‍රාහකයින්ගේ සුවිශේෂී කුසලතා ඇගයීමට ලක් කරමින් රුපියල් 100,000ක මුළු මුදල් ත්‍යාග සමඟින් පදක්කම්, සම්මාන සහ සහතිකපත් පිරිනමන ලදී. මෙරට ශිෂ්‍ය ප්‍රජාව අතර විද්‍යා විෂයයන් කෙරෙහි පවතින ආකර්ෂණය තවදුරටත් ඉහළ නැංවීමට, නවෝත්පාදන සංස්කෘතියක් ප්‍රවර්ධනය කිරීමට සහ ශ්‍රී ලංකාවේ අනාගත විද්‍යාඥයින් මෙන්ම ව්‍යවසායකයින් සවිබල ගැන්වීම වෙනුවෙන් ඉදිරි වසරවලදී මෙම 'SciFest' විද්‍යා උළෙල තවදුරටත් පුළුල් කිරීම SLIIT ආයතනයේ දිගුකාලීන අරමුණයි.