වායු කාන්දුවීමක් සම්බන්ධයෙන් ජාත්‍යන්තර අභ්‍යවකාශ මධ්‍යස්ථානයේ සිටින ගගනගාමීන්ට ඔවුන්ගේ අභ්‍යවකාශ යානයේ නවාතැන් ගන්නා ලෙස නාසා ආයතනය දැනුම් දී තිබේ.

එමෙන්ම හදිසි අවශ්‍යතාවයක් ඇතිවුවහොත් ඉන් ඉවත්විමටද සූදානමින් සිටින ලෙසද නාසා ආයතනය ගගනගාමීන්ට දැනුම්දී ඇත.

නාසා ප්‍රකාශික බෙතානි ස්ටීවන්ස් විසින් X සටහනක් තබමින් සඳහන් කර ඇත්තේ අභ්‍යවකාශ මධ්‍යස්ථානයේ රුසියානු කොටසේ කොටසක් වන ස්වෙස්ඩා සේවා මොඩියුල උමග තුළ යම් කාලයත් පුරාවට ඉරි තැලීම් සහ කාන්දුවීම්වලින් පෙලුණු බවය.

නව කාන්දුවීම්වලින් පසුව අද දිනයේදී පුළුල් අලුත්වැඩියා මෙහෙයුමක් ආරම්භ කර ඇති අතර ඒ සඳහා රුසියානු කාර්ය මණ්ඩලයක් විසින් වායු කාන්දුව නිවැරදි කිරීමට උත්සාහ ගන්නා බැවින් ආරක්ෂිත පියවර අනුගමනය කරමින් මෙලෙස නවාතැන් ගන්නා නාසා ආයතනය ගගනගාමීන්ට නියෝග කර තිබේ.

එමෙන්ම වඩාත් ස්ථීර විසඳුමක් ලබා ගැනීම සඳහා රුසියානු සඟයන් සමග මෙන්ම අභ්‍යවකාශ මධයස්ථානයට සහාය දක්වන අනෙකුත් ජාත්‍යන්තර ප්‍රජාව සමග කටයුතු කරන බවද නාසා ප්‍රකාශිකා සිය X සටහන මගින් සඳහන් කර ඇත.

මේ අතර නාසා ආයතනය විසින් දැනට ජාත්‍යන්තර අභ්‍යවකාශ මධ්‍යස්ථානයේ සිටින ගගනගාමීන් හත් දෙනාගෙන් පස් දෙනෙකුට ආරක්ෂිත පියවරක් ලෙස නම් කර ඇති SpaceX Crew Dragon "Freedom" අභ්‍යවකාශ යානය තුළ නවාතැන් ගැනීමට උපදෙස් ලබා දී තිබේ.