නවසීලන්තයේ රැකියා ලබා දෙන බව පවසා රුපියල් කෝටි 3ක මුදලක් වංචා කළ සැකකරුවෙකු බොරලැස්ගමුව ප්‍රදේශයේදී අත්අඩංගුවට ගැනීමට ශ්‍රී ලංකා විදේශ සේවා නියුක්ති කාර්යාංශයේ විශේෂ විමර්ශන අංශය සමත් වී තිබේ.

අදාළ පුද්ගලයා කාන්තා, පිරිමි දෙපාර්ශවයට රැකියා අවස්ථා ලබා දෙන බවට පවසා ඔවුන් සමග ගිවිසුම් ද අත්සන් කර ඇත.

සැකකරු අධිකරණයට ඉදිරිපත් කිරීමෙන් පසුව ලබන 15 වනදා දක්වා රක්ෂිත බන්ධනාගාර ගත කිරීමට කොටුව මහේස්ත්‍රාත්වරයා නියෝග කළේය.

මොහු කලක පටන් විමර්ශන ඒකකය මගහරිමින් සිටි සැකකරුවෙකු බවද කාර්යාංශයේ විමර්ශන ඒකකය පැවසීය.

රැකියා සඳහා විදේශගත වීමේදී ලියාපදිංචි නොවූ විදේශ රැකියා ආයතන වෙත කිසිදු පුද්ගලයෙකු තම තොරතුරු, මුදල් හෝ ගමන් බලපත්‍ර ලබා දීමෙන් වළකින ලෙස ශ්‍රී ලංකා විදේශ සේවා නියුක්ති කාර්යාංශය මහජනතාවගෙන් වැඩිදුරටත් ඉල්ලා සිටියි.