කොළඹ මහනගර සභාවේ නාගරික මන්ත්‍රීවරු දෙදෙනෙකු අතර ඇතිවූ බහින්බස්වීමක්, ගුටිබැට හුවමාරුවක් දක්වා දුරදිග යාම හේතුවෙන් එක් මන්ත්‍රීවරයෙකු තුවාල ලබා කොළඹ ජාතික රෝහලට ඇතුළත් කර තිබේ.

මෙලෙස තුවාල ලබා ඇත්තේ එක්සත් ජාතික පක්ෂ නාගරික මන්ත්‍රී රම්සි ටෝනි බවත්, පහරදී ඇත්තේ ස්වාධීන මන්ත්‍රීවරයෙකු වන උපාලි වැලිවත්ත බවත් වාර්තා වේ.

පහරදුන් මන්ත්‍රීවරයා කොළඹ නගරයේ වෙළඳසැල් පරීක්ෂාවක්, විනය විරෝධී ලෙස සිදුකළ බවට නාගරික මන්ත්‍රී රම්සි ටෝනි මහතා අද (9) සභාවාරයේදී විවේචනාත්මක අදහස් ප්‍රකාශ කර ඇති බව සඳහන්ය.

කෙසේ වෙතත් එම අවස්ථාවේ වැලිවත්ත මන්ත්‍රීවරයා සභාගර්භයේ නොසිට ඇති අතර, පසුව ඔහු එය දැනගැනීමෙන් අනතුරුව මෙම බහින්බස්වීම ගැටුමක් දක්වා වර්ධනය වී තිබේ.

මෙම ගැටුමෙන් රම්සි ටෝනි මන්ත්‍රීවරයාගේ නාසයට බරපතළ හානි සිදුව ඇති අතර, ඔහු මේ වනවිට කොළඹ ජාතික රෝහලේ නේවාසිකව ප්‍රතිකාර ලබමින් සිටී.

සිද්ධිය සම්බන්ධයෙන් කුරුඳුවත්ත පොලීසිය විමර්ශන ආරම්භ කර ඇති අතර, පහරදීමට සම්බන්ධ මන්ත්‍රීවරයා ප්‍රදේශයෙන් පලාගොස් තිබේ.

මේ දක්වා ඔහුව අත්අඩංගුවට ගැනීමට පොලීසිය හැකිවී නොමැත.