ශ්‍රී ලංකාව මහා පරිමාණ සයිබර් අපරාධ මධ්‍යස්ථානයක් වීමේ බරපතළ අවදානමක් පවතින බව සංවිධානාත්මක නීතිවිරෝධී කල්ලිවලට එරෙහි ගෝලීය සංවිධානය නිවේදනය කර තිබේ.

දැනටමත් මෙරට තුළ එවැනි මහා පරිමාණ සයිබර් වංචාවල නියැලෙන පුද්ගලයන් රැඳී සිටින බව වාර්තා වේ.

මේ වසරේ ගත වූ කාල සීමාව තුළ පමණක්, මෙවැනි වංචනික ක්‍රියාවලට සම්බන්ධ පුද්ගලයින් දහසකට අධික පිරිසක් ශ්‍රී ලංකා පොලිසිය විසින් අත්අඩංගුවට ගෙන ඇත.

නීතිවිරෝධී මිනිස් ජාවාරම් හරහා ගෙන්වාගත් ශ්‍රමිකයන් රැඳී සිටි කාම්බෝජය වැනි රටවලින් පලා එන වංචනිකයන්ගේ ප්‍රධාන ගමනාන්තය බවට ශ්‍රී ලංකාව පත්වෙමින් ඇති බව විද්වතුන් පෙන්වා දෙති.

මෙලෙස පැමිණෙන පිරිසෙන් බහුතරයක් චීන ජාතිකයින් වන බවද සඳහන් වේ.

මේ අතර, අන්තර්ජාල යෙදුම් හරහා නව මිතුරන් හඳුනා ගැනීමේදී දැඩි ලෙස සැමවිටම කල්පනාකාරී වන ලෙස පොලිසිය ජනතාවට අවධාරණය කර ඇත.

අන්තර්ජාලය ඔස්සේ මිතුදම්, ප්‍රේම සම්බන්ධතා හෝ විවාහ යෝජනා සඳහා පවතින යෙදුම් භාවිත කරමින් මුදල් මංකොල්ලකෑමේ සිදුවීම් රැසක් මෑතකදී වාර්තා වී තිබේ.

මෙම වංචාවල නිරත වන්නන්, කෙටි හෝ දිගු කාලයක් පුරා ආකර්ෂණීය අයුරින් පණිවිඩ යවමින් අහිංසක ජනතාව රැවටීමට ලක් කරන බව හෙළි වී ඇත.

වර්තමානයේ සමාජ මාධ්‍ය සහ කතාබහේ යෙදෙන වේදිකා හරහා මෙවැනි මුදල් වංචා ඉහළ ගොස් ඇති බැවින්, බැංකු ගිණුම් විස්තර, පුද්ගලික තොරතුරු මෙන්ම ඡායාරූප වෙනත් පාර්ශ්වයන් සමඟ හුවමාරු කර ගැනීමෙන් සම්පූර්ණයෙන්ම වැළකී සිටින ලෙස පොලිසිය මහජනතාවගෙන් ඉල්ලා සිටියි.