ශ්‍රී ලංකා බාලදක්ෂ සංගමයට වසර 115ක් සපිරීම නිමිත්තෙන් 11 වන වරටත් සංවිධානය කරන ජාතික බාලදක්ෂ ජම්බෝරිය 2027 වසරේ ජනවාරි මස 17 වෙනි දින සිට 23 වෙනිදා දක්වා දියගම මහින්ද රාජපක්ෂ ජාත්‍යන්තර ක්‍රීඩා සංකීර්ණය කේන්ද්‍ර කරගෙන පැවැත්වීමට සැලැසුම් කර තිබේ. 

ඒ සඳහා දෙස් විදෙස් බාලදක්ෂයින් 12,000කට අධික ප්‍රමාණයක් සහභාගිවීමට සැලසුම් කර ඇති බව ජනාධිපති මාධ්‍ය අංශය නිවේදනය කළේය.

ශ්‍රී ලංකා ජාතික බාලදක්ෂ ජම්බෝරියට අනුග්‍රහය දක්වන රාජ්‍ය සහ පෞද්ගලික ආයතනවල ප්‍රධානීන් සහ ජනාධිපති ලේකම් ආචාර්ය නන්දික සනත් කුමානායක මහතා අතර සාකච්ඡාවක් ජනාධිපති ලේකම් කාර්යාලයේදී ඊයේ (07) පස්වරුවේ පවත්වන ලදී.

බාලදක්ෂ ජම්බෝරිය සාර්ථක කර ගැනීම වෙනුවෙන් අනුග්‍රහය දක්වන රාජ්‍ය ආයතන සහ මූල්‍යමය අනුග්‍රහය දක්වන රාජ්‍ය සහ පෞද්ගලික ආයතන විසින් ඊට ලබා දෙන දායකත්වය සම්බන්ධවද මෙහිදී සාකච්ඡා කෙරිණි.

එහිදී පාසල් ළමුන්ට ඉතා සුවිශේෂ අවස්ථාවක් වන බාලදක්ෂ ජම්බෝරිය සාර්ථක කර ගැනීමට සහාය දැක්වීම ඉතා වැදගත් බවත්, මේ වෙනුවෙන් රජය උපරිම සහාය ලබා දීමට සමගාමීව පෞද්ගලික අංශයේ දායකත්වයද අවශ්‍ය බවත් ජනාධිපති ලේකම්වරයා මෙහිදී පෙන්වා දුන්නේය.

ජනාධිපති ජ්‍යෙෂ්ඨ අතිරේක ලේකම් රෝෂන් ගමගේ, ප්‍රධාන බාලදක්ෂ කොමසාරිස් නීතිඥ මනෝජ් නානායක්කාර, ජාත්‍යන්තර කොමසාරිස් හා ජම්බරි සම සංවිධායක වෛද්‍ය අසංක ඒරියාව, ජම්බරි සම සංවිධායක සහාය ප්‍රධාන කොමසාරිස් ඉංජිනේරු අමිල් අබේසුන්දර යන මහත්වරු, සහකාර ප්‍රධාන කොමසාරිස්වරු, රාජ්‍ය ආයතනවල නිලධාරීහු, රාජ්‍ය සහ පෞද්ගලික අනුග්‍රාහක සමාගම්වල නිලධාරීහු, ඇතුළු පිරිසක් මෙම අවස්ථාවට එක්ව සිටියහ.