හෝමුස් සමුද්‍ර සන්ධියේ පවතින තත්ත්වය යුද්ධයට පෙර පැවැති තත්ත්වයට ආපසු හැරවීමට ඉරානය ඉඩ නොදෙන බවට එරට පාර්ලිමේන්තු කථානායක සහ ඇමරිකාව සමග පැවැති සාකච්ඡාවල ප්‍රධාන නියෝජිතයා වූ මොහොමඩ් බගර් ගාලිබාෆ් අනතුරු අඟවා තිබේ.

ඔහු සඳහන් කරන්නේ හෝමුස් සමුද්‍ර සන්ධියේ ආරක්ෂාව තහවුරු වන්නේ ඇමරිකානු බළඇණි එම කලාපයෙන් ඉවත්වීමෙන් පමණක් බවයි.

එමෙන්ම ඉරානයට සිය තෙල් අලෙවි කිරීමට ඉඩ නොදෙන්නේ නම්, පර්සියානු ගල්ෆ් කලාපයේ කිසිදු රටකට තෙල් අලෙවි කිරීමට ඉඩ නොදෙන බවට ද ගාලිබාෆ් වැඩිදුරටත් අනතුරු අඟවා සිටියි.

X සමාජ මාධ්‍ය ගිණුමේ සටහනක් තබමින් ගාලිබාෆ් පෙන්වා දෙන්නේ මෙම අර්බුදය මේ වන විට "සියල්ලන්ම හෝ කිසිවකුත් නැත" යන මට්ටමකට පත්ව ඇති බවයි.

"අපට තෙල් අලෙවි කිරීමට නොහැකි කලාපයක කිසිදු රටකට තෙල් අලෙවි කිරීමට ඉඩ ලැබෙන්නේ නැහැ. අපගේ ආරක්ෂාව තහවුරු නොවේ නම් කිසිදු යටිතල පහසුකමකට ආරක්ෂාවක් හිමිවන්නේ නැහැ. එමෙන්ම හෝමුස් සමුද්‍ර සන්ධියේ ආරක්ෂාව රැඳී තිබෙන්නේ ඇමරිකානු බළඇණි එහි නොමැතිවීම මතයි. සමුද්‍ර සන්ධියේ තත්ත්වය නැවත යුද්ධයට පෙර පැවැති තත්ත්වයට පත්නොවන බව අපි නැවත නැවතත් ප්‍රකාශ කර තිබෙනවා," යනුවෙන් ඔහු එහි සටහන් කර තිබේ.

හෝමුස් සමුද්‍ර සන්ධිය ඔස්සේ යාත්‍රා කරන නෞකාවකට ඉරානය ප්‍රහාරයක් එල්ල කරන සෑම අවස්ථාවකම, ඉරානයේ එක් පාලමක් හෝ බලගාරයක් විනාශ කරන බවට ඇමරිකානු ජනාධිපති ඩොනල්ඩ් ට්‍රම්ප් විසින් කරන ලද අනතුරු ඇඟවීමෙන් අනතුරුව ඉරාන කථානායකවරයා මෙම අදහස් පළකර ඇත.

සිය 'Truth Social' සමාජ මාධ්‍ය ගිණුමේ සටහනක් තබමින් ට්‍රම්ප් ප්‍රකාශ කර තිබුණේ, "මෙතැන් සිට ඉරාන ඉස්ලාමීය ජනරජය විසින් හෝමුස් සමුද්‍ර සන්ධියේ ගමන් ගන්නා නෞකාවකට මිසයිල, රොකට්, ඩ්‍රෝන හෝ වෙනත් ඕනෑම ආයුධයකින් ප්‍රහාරයක් එල්ල කරන සෑම අවස්ථාවකම, ඇමරිකාව විසින් ඉරානයේ අගනුවර වන ටෙහෙරාන් නුවර හෝ ඒ ආසන්නයේ පිහිටි එක පාලමක් හෝ විදුලි බලාගාරයක් බෝම්බ හෙළා විනාශ කර දමනු ඇත" යනුවෙනි.

දෙපාර්ශ්වය විසින්ම එකිනෙකාගේ සිවිල් යටිතල පහසුකම් වෙත එල්ල කරන ප්‍රහාර ඉහළ ගොස් ඇති පසුබිමක, ඉරානයට එරෙහිව 12 වැනි රාත්‍රියටත් ගුවන් ප්‍රහාර එල්ල කළ බව ඇමරිකානු හමුදාව ඊයේ නිවේදනය කර තිබිණි.

ඇමරිකානු මධ්‍යම විධානය සඳහන් කරන්නේ හෝමුස් සමුද්‍ර සන්ධියේ බලය නැවත ලබා ගැනීමටත්, ජාත්‍යන්තර නෞකා ගමනාගමනය යථා තත්ත්වයට පත් කිරීමටත් දරන උත්සාහය අතරතුර, කලාපීය මුහුදු සීමා හරහා ගමන් ගන්නා සිවිල් නාවිකයන්ට සහ වෙළෙඳ නෞකාවලට ඉරානයෙන් එල්ලවන තර්ජන තවදුරටත් අවම කිරීම සඳහා මෙම ප්‍රහාර එල්ල කළ බවයි.

ගෝලීය බලශක්ති සැපයුමට අතිශය තීරණාත්මක වූ මෙම මුහුදු මාර්ගය තවදුරටත් වසා දමා ඇති අතර, රාජ්‍යතාන්ත්‍රික විසඳුමකට එළැඹීමේ සලකුණු ප්‍රසිද්ධියේ දක්නට නොමැති පසුබිමක දෙපාර්ශ්වයේම නිලධාරීන් තම ස්ථාවරය තුළ දැඩිව එල්බ සිටිනු දක්නට ලැබේ.

මෙම ජනප්‍රිය නොවන යුදමය තත්ත්වය හේතුවෙන් ගෝලීය ආර්ථිකයට තවදුරටත් බලපෑම් එල්ල වෙමින් පවතින අතර, එළැඹෙන සරත් ඍතුවේ පැවැත්වීමට නියමිත ඇමරිකානු අතුරු මැතිවරණයට පෙර ඉන්ධන මිල ගණන් ද ඉහළ යමින් පවතී.

ඉරාන විදේශ අමාත්‍ය සෙයියඩ් අබ්බාස් අරාග්චි ප්‍රකාශ කළේ සිය රට 'ඇසට ඇසක්' ප්‍රතිපත්තිය මත පදනම් වූ ආරක්ෂක උපාය මාර්ගයක් අනුගමනය කරන බවයි.

"අපගේ යටිතල පහසුකම් ඇතුළුව ඉරානයට එරෙහිව එල්ල වන ඕනෑම ප්‍රහාරයකට ප්‍රබල සහ තීරණාත්මක ප්‍රතිචාරයක් දැක්වීමට අපි පියවර ගන්නවා," යනුවෙන් ඔහු ඉකුත් බදාදා දිනයේදී X සමාජ මාධ්‍ය ගිණුමේ සටහන් කර තිබිණි.

බටහිර ඉරානයේ අහ්වාස්, රාම්ෂීර් සහ අන්දිමේෂ්ක් යන නගර ආසන්නයේ පිහිටි ස්ථාන වෙත ඇමරිකානු මිසයිල පතිත වූ බව ඉරාන රාජ්‍ය මාධ්‍ය වාර්තා කළේය.

එමෙන්ම ඉරාක සීමාවේ පිහිටි ෂලාම්චේ නගරයට එල්ල වූ ඇමරිකානු මිසයිල ප්‍රහාරයකින් පුද්ගලයන් දෙදෙනකු මියගිය බව ද ඉරාන රාජ්‍ය මාධ්‍ය බ්‍රහස්පතින්දා උදෑසන තහවුරු කළේය.

මේ අතර, ඉරානයේ සතුරු ප්‍රහාර හමුවේ සතුරු ඩ්‍රෝන යානා විනාශ කිරීමට තමන්ගේ ගුවන් ආරක්ෂක පද්ධති ක්‍රියාත්මක වූ බව කුවේට් හමුදා නිලධාරීන් සමාජ මාධ්‍ය ඔස්සේ සඳහන් කර සිටියේය.

ඇමරිකානු ප්‍රහාරවලට ප්‍රතිචාර වශයෙන් ඉරානය ද අසල්වැසි ගල්ෆ් කලාපීය රටවල බලශක්ති යටිතල පහසුකම් සහ පානීය ජලය සපයන ලුණු නිස්සාරණ බලාගාර ඉලක්ක කරමින් ප්‍රහාර එල්ල කර ඇත.

ජාත්‍යන්තර නීතියට අනුව, යටිතල පහසුකම් හමුදාමය කටයුතු සඳහා යොදා නොගන්නේ නම් එවැනි ස්ථාන වෙත ප්‍රහාර එල්ල කිරීම සාමාන්‍යයෙන් තහනම් වේ.