Best News Website award
brand logo
logo
මෙම මාසය අවසන් වනවිට උද්ධමනය 9%ක් දක්වා ඉහළ යා හැකියි – මහ බැංකු අධිපති

මෙම මාසය අවසන් වනවිට උද්ධමනය 9%ක් දක්වා ඉහළ යා හැකියි – මහ බැංකු අධිපති

20 November 2026

ලබන මාසය වනවිට මෙරට උද්ධමන අනුපාතය සියයට 9ක් හෝ ඊට ආසන්න මට්ටමක් දක්වා ඉහළ යා හැකි බව ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ මහතා පවසයි.


ඔහු මේ බව පවසා සිටියේ අද (20) මුදල් ප්‍රතිපත්ති විවරණය දැනුම් දීමේ මාධ්‍ය හමුවට එක් වූ අවස්ථාවේ දී යි.


මැදපෙරදිග පවතින යුදමය තත්ත්වය අපේක්ෂා කළ කාලයට වඩා දිගුකාලයක් පැවතීම සහ ඒ හේතුවෙන් ජාත්‍යන්තර වෙළෙඳපොළේ ඉන්ධන මිල ඉහළ මට්ටමක පැවතීම මෙලෙස උද්ධමනය ඉහළ යාමට බලපා ඇති බව ඔහු පෙන්වා දෙයි.


මහ බැංකු අධිපතිවරයා සඳහන් කළේ පසුගිය මාසය අවසානයේදී මෙරට උද්ධමනය සියයට 8.3ක් ලෙස වාර්තා වූ බවයි.


2026 මැයි මාසයේදී පොලී අනුපාත ඉහළ නැංවීමට තීරණය කළ අවස්ථාවේදී උද්ධමනය සියයට 7ත් 8ත් අතර මට්ටමකට ඉහළ ගොස් අනතුරුව පහළ යනු ඇතැයි පුරෝකථනය කර තිබූ බව ද ඔහු පැවසීය.

කෙසේ වෙතත්, මැදපෙරදිග යුදමය තත්ත්වය අපේක්ෂා කළ කාලයට වඩා දිගුකාලයක් පැවතීම හේතුවෙන් එම පුරෝකථන වෙනස් වී ඇති බව ද මහ බැංකු අධිපතිවරයා සඳහන් කළේය.

උද්ධමනය ඉලක්කගත සියයට 5 මට්ටමට හැකි ඉක්මනින් ළඟා කර ගැනීමේ වැදගත්කම අවධාරණය කළ ඔහු, ඉහළ උද්ධමනය හේතුවෙන් රටේ ආර්ථිකයට මෙන්ම ජනතාවගේ ජීවන තත්ත්වයට සහ මිලදී ගැනීමේ හැකියාවට ද දැඩි බලපෑම් එල්ල වන බව පෙන්වා දුන්නේය.

"අපි 2026 මැයි මාසයේ පොලී අනුපාතය වැඩි කරන අවස්ථාවේදී ඒ වෙලාවේ තිබුණු පුරෝකථනය තමයි උද්ධමනය සියයට 7ක් වගේ මට්ටමකට නැවත අඩුවෙයි කියන බලාපොරොත්තුව. නමුත් දැන් දකින පුරෝකථනය අනුව, බලාපොරොත්තු වූ ආකාරයට විශේෂයෙන් ජාත්‍යන්තර තත්ත්වය ඊට වඩා දීර්ඝ කාලයක් පැවතුණා. ඒ අවස්ථාවේ මේ යුද තත්ත්වය කෙටි කාලීනව පවතී, ඊට පසුව මේ තෙල් මිල යම්කිසි ආකාරයකට ස්ථාවර වෙයි කියලා බලාපොරොත්තු වුණා. නමුත් ඒක මේ මෑතක් වෙනකන්ම ඉහළ මට්ටමක පැවතුණා. ඒක නිසා උද්ධමනයත් අපි බලාපොරොත්තු වුණාට වඩා ඉහළ මට්ටමකට ගියා. ගිය මාසයේ උද්ධමනය සියයට 8.3ක් වුණා. අපිට පේනවා ලබන මාසය විතර වනවිට සියයට 9ක් හෝ ඊට ඉහළ හෝ ඊට ආසන්න මට්ටමක මේ උද්ධමනය පවතින බවට අපේ පුරෝකථනයේ පෙන්නුම් කරනවා."


 

More News..