පොලිස් විමර්ශනවලට අදාළව බන්ධනාගාර ගතකර සිටින රැඳවූවන් විමර්ශන කටයුතු සඳහා නැවත පොලිස් භාරයට ගැනීමට නව නීතියක් සම්පාදනය කරමින් සිටින බව පොලිස් ආරංචි මාර්ග සඳහන් කරයි.

ඒ අනුව විවිධ වැරැදි සම්බන්ධයෙන් බන්ධනාගාර ගතකර සිටින රැඳවූවන් සම්බන්ධයෙන් විමර්ශන කටයුතු කෙරෙන අදාළ පොලිස් ස්ථාන වෙත ඔවුන් නැවත රැගෙන ගොස් රඳවා ගෙන ප්‍රශ්න කිරීමට හැකියාව ලැබෙනු ඇතැයි පොලිසිය සඳහන් කරයි. විමර්ශනය කෙරෙමින් පවතින නඩුවලට අදාළව නව කරුණු අනාවරණය කර ගැනීම සඳහා මෙම ක්‍රියාමාර්ග ගැනීමට නියමිතය. තවද අපරාධකරුවන් බන්ධනාගාරයේ සිට මෙහෙයවනු ලබන අපරාධ පාලනය කිරීමට ද එමගින් හැකිවනු ඇතැයි පොලිසිය විශ්වාසය පළකරයි.

අපරාධවලට අදාළව පොලිස් විමර්ශන සම්බන්ධයෙන් අත්අඩංගුවට ගන්නා සැකකරුවන් විසින් සිරගතව සිටින අපරාධකරුවකු පිළිබඳව අනාවරණය කළහොත් ඔවුන්වද මෙලෙස පොලිසිය භාරයට ගැනීමට හැකියාව ලැබෙනු ඇත.

එමෙන්ම රැඳවූවන් සම්බන්ධ වූ සංවිධානාත්මක අපරාධ කල්ලි මත්ද්‍රව්‍ය ජාලයන් හෝ මූල්‍ය වංචාවන් පිටුපස සිටින සෙසු පුද්ගලයන් අනාවරණය කරගැනීමද මෙහිදී හැකිවනු ඇතැයි පොලිසිය සඳහන් කරයි. මෙම ක්‍රියාවලිය සම්පූර්ණයෙන්ම අධිකරණ අධීක්ෂණය සහ මානව හිමිකම් සුරැකෙන නීතිමය රාමුවක් යටතේ කිරීමට අපේක්ෂිත ය.

මේ සම්බන්ධයෙන් පොලිසියේ උසස් නිලධාරීන් හා අධිකරණ අමාත්‍යාංශය අතර සාකච්ඡා වට කිහිපයක්ම පවත්වා තිබේ.