නුවරඑළිය ප්‍රදේශයේ පවතින අයහපත් කාලගුණික තත්ත්වය හේතුවෙන්,ඊයේ (18) දින සවස් කාලයේ ඇද හැලුණු අධික වර්ෂාවත් සමඟ ගංවතුර නුවරඑළිය – හැටන් ප්‍රධාන මාර්ගය මතට ගලා ආවේය.

නානුඔය – රැදැල්ල කෙටි මාර්ගයේ පිහිටි කාර්ලිබැක් හන්දිය ආශ්‍රිතව ගංවතුර මට්ටම පෙර නොවූ විරූ ඉහළ අගයක් ගත් අතර, එමගින් පැය දෙකක පමණ කාලයක් රථවාහන ගමනාගමනය සම්පූර්ණයෙන්ම ඇනහිටි අතර ප්‍රදේශවාසීන්ගේ දෛනික ජීවිතයට ද බාධා එල්ල විය.

දිගින් දිගටම ඇද හැලුණ වර්ෂාව හේතුවෙන් නනු ඔය කෙල්සි සහ මහ එළිය වතුයායන් තුළ පිහිටි මාර්ග කිහිපයක් ද ලයෙන් යට වී තිබුණි.

අද දින උදෑසන වන විට, නානුඔය රැදැල්ල කෙටි මාර්ගයේ කාර්ලිබැක් හන්දිය ආශ්‍රිත ගංවතුර මට්ටම තරමක් පහළ ගොස් ඇති අතර, ඒ හේතුවෙන් එම ප්‍රදේශය හරහා ඉතා අපහසුවෙන් වුවද සීමිත ගමනාගමනයකට ඉඩ ලැබී ඇති අතර, දැනට එම ප්‍රදේශය ඝන මඩ තට්ටුවකින් වැසී පවතී.

මීට අමතරව,ඊයේ (18) දින අයහපත් කාලගුණය සහ නොකඩවා ඇද හැලුණ අධික වර්ෂාව හේතුවෙන් නනු ඔය ඩෙස්ෆෝඩ් ප්‍රදේශය ද ජලයෙන් යට වී ඇත.

නිවාස රැසකට ගංවතුර ජලය ඇතුළු වීම නිසා එහි පදිංචිකරුවන්ට තම නිවෙස්වලින් ඉවත් වී ඥාතීන්ගේ නිවෙස්වල රැකවරණය පැතීමට සිදුව ඇති අතර, එමගින් ඔවුන්ගේ සාමාන්‍ය ජීවිතයට දැඩි බාධා එල්ල වී තිබේ.

මෙම ගංවතුර තත්ත්වය හේතුවෙන් ගංගා කිහිපයක සහ කුඩා ජලාශවල බැමිවලට ද හානි සිදුව ඇත.

නුවරඑළිය – නානුඔය ප්‍රදේශයේ නාගරික ගංවතුර තත්ත්වය මේ වන විට බරපතල ගැටලුවක් බවට පත්ව තිබෙන බවත්, ගංගා, පොකුණු සහ ස්වභාවික ජල මාර්ග අවහිර වන පරිදි ඉදිකර ඇති නීති විරෝධී සහ සැලසුම් රහිත ඉදිකිරීම් මෙම හදිසි ගංවතුර තත්ත්වයන්ට සහ ආපදාවලට ප්‍රධාන හේතුව බව ප්‍රදේශවාසීහු පෙන්වා දෙති.

මෙලෙස ජල මාර්ග අවහිර වීම හේතුවෙන්, වැසි සමයේදී ගංවතුර ජලය නේවාසික ප්‍රදේශවලට වේගයෙන් ගලා එන බවත්, එමගින් විශාල හානියක් සිදුවන බවත් ඔවුහු සඳහන් කරති.