පවතින වැසි තත්ත්වයත් සමග දිවයිනේ ප්‍රධාන ජලාශ රැසක ජල මට්ටම් මේ වන විට ශීඝ්‍ර ලෙස ඉහළ යමින් පවතින බව වාරිමාර්ග දෙපාර්තමේන්තුව පවසයි.

එම දෙපාර්තමේන්තුවේ ජල විද්‍යා හා ආපදා කළමනාකරණ අංශයේ අධ්‍යක්ෂ එල්.එස්. සූරියබණ්ඩාර මහතා පැවසුවේ තෙත් කලාපයේ වර්ෂාපතනය සැලකිය යුතු වැඩිවීමක් පෙන්නුම් කළ බවය.

ලැබී ඇති වර්ෂාපතනයන් අනුව නිල්වලා, ගිං ගඟ, කළුගඟ, මහවැලි ගඟ, කැලණි ගඟ, සහ අත්තනගලු ඔය යන ප්‍රධාන ජලාශවල ජල මට්ටම් මේ වන විට ශීඝ්‍රව ඉහළ යමින් පවතින බවද ඒ මහතා සඳහන් කළේය.

පසුගිය පැය 24 තුළ මිලිමීටර් 150ට ආසන්න වර්ෂාපතනයක් කැලණි සහ මහවැලි ගඟ ආශ්‍රිත ඉහළ ප්‍රදේශ වෙත ඇද හැළුණු බව පැවසූ ඒ මහතා මෙම තත්ත්වයන් පිළිබඳව වාරිමාර්ග දෙපාර්තමේන්තුව අවධානය යොමු කර ඇති බවත් ඒ අනුව ඉදිරි ගංවතුර අනතුරු ඇඟවීම් පිළිබඳව ජනතාව දැනුවත් කිරීමට පියවර ගන්නා බවද සඳහන් කළේය.

මේ වන විට මහවැලි ගඟ ආශ්‍රිතව නාවලපිටිය ප්‍රදේශ වෙත මහ ගංවතුර තත්ත්වයක් දක්වා ජල මට්ටම් ඉහළ ගොස් ඇතැයිද පැවසූ ඒ මහතා ඒ අනුව නාවලපිටිය, පේරාදෙණිය සහ ගම්පල ඇතුළු එම ප්‍රදේශ ආශ්‍රිතව පදිංචි ජනතාව මේ පිළිබඳව දැඩි අවධානයෙන් යුතුව කටයුතු කළ යුතු බවද පෙන්වා දුන්නේය.

එමෙන්ම කැලණි ගඟ ආශ්‍රිතව නෝවුඩ්, කිතුල්ගල සහ අවිස්සාවේල්ල ජල මට්ටම් ඉහළ යමින් පවතින බවත් මේ හේතුවෙන් අවිස්සාවේල්ල, කිතුල්ගල, යටියන්තොට සහ නෝවුඩ් ආශ්‍රිතව පදිංචිව සිටින ජනතාවද අවධානය යොමු කළ යුතුව ඇතැයිද ඒ මහතා සඳහන් කළේය.

අත්තනගලු ඔය ආශ්‍රිතව සාමාන්‍ය ජල මට්ටම් වැඩි වීමක් පෙන්නුම් කළද මේ වන විටත් වර්ෂාපතනය වැඩි වීමත් සමග සැලකිය යුතු ක්ෂණික ගංවතුර තත්ත්වක් දක්වා වර්ධනය වීමේ හැකියාවක් ඇතැයිද පෙන්වා දුන්නේය.

කළුගඟ ආශ්‍රිතව රත්නපුර, මිල්ලකන්ද, මගුරු ඔය ආශ්‍රිත ජල මට්ටම්ද සැලකිය යුතු වැඩිවීමක් පෙන්නුම් කර ඇතැයිද ඇතැම් ස්ථාන වෙත සුළු ගංවතුර තත්ත්වක් දක්වා මේ වන විටත් වර්ධනය වී ඇති බව පැවසූ ඒ මහතා බුලත්සිංහල, පාලින්දනුවර වැනි කුඩා ගඟ ආශ්‍රිතව පවතින ප්‍රදේශවල ජනතාව මේ පිළිබඳව සැලකිලිමත් විය යුතු බවද පැවසීය.

තවද කළු ගඟ ආශ්‍රිතව රත්නපුර සහ ඒ අවට ප්‍රදේශවලටත් මේ වන විට සැලකිය යුතු වර්ෂාපතයක් ලැබී ඇති බැවින් ඒ පිළිබඳව එම ප්‍රදේශ ආශ්‍රිත ජනතාවද සැලකිලිමත් වන ලෙස ද ඒ මහතා දන්වා සිටියේය.

නිල්වලා සහ ගිංග ඉහළ ද්‍රෝණිය වෙත මිලිමීටර් 100 ඉක්මවූ වැසි ඇතැම් ස්ථානවල දක්නට ලැබුණු බැවින් මේ සමගම තවලම, හිනිදුම, නාගොඩ වැනි ප්‍රදේශවල ජල මට්ටම් වැඩිවන බවත්, නිල්වලා ගඟේ ජල මට්ටම් මේ වන විට ක්‍රමයෙන් වැඩිවන බැවින් අකුරැස්ස සහ පිටබැද්දර යන ප්‍රදේශවල ලැබෙන වර්ෂාපතනයන් අනුව ඉදිරියේදි මේ ප්‍රදේශ ආශ්‍රිතව පහත්බිම්වල පදිංචි ජනතාව අවධානයෙන් යුතුව කටයුතු කළ යුතු බවද ඒ මහතා වැඩිදුරටත් අදහස් දක්වමින් පැවසීය.