මෙම වසරේදී තවදුරටත් පොලී අනුපාත ඉහළ නැංවීමේ අවශ්‍යතාවක් නොමැති මහ බැංකු අධිපති ආචාර්ය නන්දලාල් වීරසිංහ මහතා පවසයි.

අමෙරිකානු ඩොලර් මිලියන 2.9ක ජාත්‍යන්තර මූල්‍ය අරමුදලේ වැඩසටහන යටතේ ආර්ථිකය යථා තත්ත්වයට පත්වෙමින් පවතින අතර, උද්ධමනය පාලනය කරමින් ආර්ථික වර්ධනයට බාධාවක් නොවන ලෙස මූල්‍ය ප්‍රතිපත්තිය පවත්වාගෙන යාම අරමුණ වී ඇති බව ඔහු සඳහන් කර තිබේ.

ඉරාන යුද තත්ත්වය හේතුවෙන් ඇති වූ උද්ධමන පීඩනය පාලනය කිරීම සඳහා පසුගිය මැයි මාසයේදී මහ බැංකුව පොලී අනුපාත පදනම් ඒකක 100කින් ඉහළ නැංවූ අතර, එය වසර තුනකට වැඩි කාලයකින් පසු සිදුකළ පළමු පොලී අනුපාත ඉහළ නැංවීම විය.

මහ බැංකු අධිපතිවරයා පවසන්නේ එම තීරණය උද්ධමනය සියයට 7ක් දක්වා ඉහළ යනු ඇතැයි අපේක්ෂා කළ බැවින් ගත් “පූර්ව ක්‍රියාමාර්ගයක්” බවයි.

කෙසේ වෙතත්, මේ දක්වා උද්ධමනය අපේක්ෂිත මට්ටම්වලට අනුකූලව පවතින බැවින්, මූල්‍ය ප්‍රතිපත්තිය තවදුරටත් දැඩි කිරීමට හෝ ලිහිල් කිරීමට අවශ්‍යතාවක් පෙනී නොයන බවද ඔහු සඳහන් කර ඇත.

ශ්‍රී ලංකාවේ ප්‍රධාන උද්ධමන දර්ශකය වන කොළඹ පාරිභෝගික මිල දර්ශකය අනුව ජූලි මාසයේ උද්ධමනය සියයට 7.3ක් දක්වා ඉහළ ගොස් ඇති අතර, එය වසර තුනකින් වාර්තා වූ ඉහළම වර්ධන වේගයයි.

මහ බැංකු අධිපතිවරයා පෙන්වා දෙන්නේ මැයි මාසයේ පොලී අනුපාත ඉහළ නැංවීමේ සම්පූර්ණ බලපෑම ආර්ථිකයට දැනීමට මාස 12ත් 18ත් අතර කාලයක් ගතවනු ඇති බවයි. ඒ අනුව, ලබන වසරේ පළමු භාගයේදී උද්ධමනය මහ බැංකුවේ සියයට 5ක ඉලක්කය වෙත නැවත පැමිණෙනු ඇතැයි අපේක්ෂා කරන බවද ඔහු සඳහන් කර තිබේ.

මේ අතර, 2024 සහ 2025 වසරවලදී ශ්‍රී ලංකා ආර්ථිකය සියයට 5ක වර්ධනයක් වාර්තා කර තිබූ අතර, 2022 ආර්ථික අර්බුදයෙන් පසු එය සැලකිය යුතු ප්‍රකෘතිමත් වීමක් ලෙස සැලකේ.

එහෙත් මහ බැංකු අධිපතිවරයා පවසන්නේ අඩු උද්ධමනය අනාගත ආර්ථික වර්ධනය සඳහා අත්‍යවශ්‍ය කොන්දේසියක් බවත්, මේ වසරේ ආර්ථික වර්ධනය සියයට 4ත් 5ත් අතර පරාසයක පවතිනු ඇතැයි අපේක්ෂා කරන බවත්ය.

එමෙන්ම, ඉන්ධන ආනයන වියදම් ඉහළ යාම හේතුවෙන් රටේ බාහිර ගිණුම් වෙත ඇතිවිය හැකි පීඩනය හමුවේ විදේශ විනිමය සංචිත ශක්තිමත් කිරීමද ප්‍රමුඛතාවක් බව මහ බැංකු අධිපතිවරයා සඳහන් කර තිබේ.

දැනට පවතින ආසන්න වශයෙන් අමෙරිකානු ඩොලර් බිලියන 6.6ක දළ විදේශ විනිමය සංචිත වසර අවසන් වන විට අමෙරිකානු ඩොලර් බිලියන 8ක් පමණ දක්වා ඉහළ නැංවීම සිය ඉලක්කය බවද ඔහු වැඩිදුරටත් ප්‍රකාශ කර ඇත.