ෆේස්බුක් ඔස්සේ සංවිධානය කරන සාද සහ ඒවා පැවැත්වෙන ස්ථාන සම්බන්ධයෙන් බුද්ධි තොරතුරු ලබාගැනීමේ විශේෂ වැඩපිළිවෙළක් පොලිස්පතිවරයා විසින් ආරම්භ කර ඇති බව පොලීසිය පවසයි.

පොලිස් මාධ්‍ය ප්‍රකාශක සහකාර පොලිස් අධිකාරි එෆ්.යූ. වුට්ලර් මහතා සඳහන් කළේ, එම වැඩපිළිවෙළේ ප්‍රතිඵලයක් ලෙස මීට දින කිහිපයකට පෙර තෙල්දෙණිය පොලිස් වසමේ පැවති ෆේස්බුක් සාදයකට සහභාගී වූ තරුණ තරුණියන් 41 දෙනෙකු අත්අඩංගුවට ගැනීමට හැකි වූ බවයි.

ඉදිරියේදී ද මෙවැනි ස්ථාන සම්බන්ධයෙන් බුද්ධි තොරතුරු අඛණ්ඩව ලබාගැනීමේ වැඩපිළිවෙළ ක්‍රියාත්මක කරන බව පොලිස් මාධ්‍ය ප්‍රකාශකවරයා පැවසීය.

ෆේස්බුක් සාද මුවාවෙන් තරුණ තරුණියන් මත්ද්‍රව්‍ය ජාවාරම්කරුවන්ගේ ගොදුරු බවට පත්වීමේ අවදානමක් පවතින බැවින්, එවැනි සාද සම්බන්ධයෙන් අවධානයෙන් කටයුතු කරන ලෙසද ඔහු ජනතාවගෙන් ඉල්ලා සිටියේය.

මෙවැනි සාද ඇතැම් අවස්ථාවල මත්ද්‍රව්‍ය ජාවාරමට සම්බන්ධ පුද්ගලයන් විසින් සංවිධානය කරන බවත්, ඒවා ජාලගත අපරාධ හා මුදල් ඉලක්ක කරගත් ව්‍යාපාර බවත් පොලිස් මාධ්‍ය ප්‍රකාශකවරයා සඳහන් කළේය.

එමෙන්ම තම දරුවන්ගේ කතාබහේ, හැසිරීම්වල සහ ගමන්බිමන්වල සිදුවන වෙනස්කම් පිළිබඳව අවධානය යොමු කරන ලෙසද ඔහු දෙමාපියන්ගෙන් ඉල්ලා සිටියේය.

මේ අතර, මත්ද්‍රව්‍ය ව්‍යසනය හේතුවෙන් 2025 වසරේ පුද්ගලයින් 175 දෙනෙකු සියදිවි හානි කරගෙන ඇති බවත්, ඉන් පිරිමි පුද්ගලයින් 172 දෙනෙකු සහ කාන්තාවන් තිදෙනෙකු වන බවත් පොලිස් මාධ්‍ය ප්‍රකාශකවරයා සඳහන් කළේය.

2026 වසරේ මේ දක්වා මත්ද්‍රව්‍ය සම්බන්ධයෙන් පුද්ගලයින් 11 දෙනෙකු මියගොස් ඇති බවද ඔහු වැඩිදුරටත් පැවසීය.