අතුරුගිරිය නගරයේ 170 බස් නැවතුම්පොළ ඉදිරිපිටදී මෙට්‍රෝ වර්ගයේ බස් රථයක ගැටුණු පුද්ගලික බස් රථයට තාවකාලික ධාවන තහනම් නියෝගයක් නිකුත් කර තිබේ.

ඊයේ (08) දින මෙම පුද්ගලික බස් රථය මෙට්‍රෝ බස් රථයේ ගැටී ඇති අතර සිද්ධිය සම්බන්ධයෙන් අතුරුගිරිය පොලිස් ස්ථානය විසින් මෝටර් රථ පරීක්ෂකවරයෙකු යටතේ අදාළ බස් රථය පරීක්ෂාවට ලක් කර ඇත.

එහිදී එම බස් රථය නිසි ආකාරයෙන් නඩත්තු නොකළ බස් රථයක් බවට නිර්දේශ කරමින් මෝටර් රථ පරීක්ෂක විසින් තාවකාලික ධාවන තහනම් නියෝගයක් නිකුත් කිරීමට පියවර ගෙන තිබේ.

අතුරුගිරිය - පිටකොටුව මාර්ගයේ ගමන් ගන්නා මෙම පුද්ගලික බස් රථය අතුරුගිරිය බස් නැවතුම්පොළේ නැවැත්වීම සඳහා ප්‍රධාන මාර්ගය හරහා පසුපසට ගැනීමේදී මිලේනියම් සිටි - පිටකොටුව මාර්ගයේ ගමන් ගන්නා මෙට්‍රෝ බස් රථයේ ගැටී ඇත.

ඒ අනුව සිදුකරනු ලැබූ විමර්ශනයට අනුව අනතුරුට ලක්වන ආකාරය නිරීක්ෂණය වන CCTV දර්ශනද ලබා ගනිමින් කඩුවෙල අධිකරණය වෙත අද (10) දිනයේදී කරුණු වාර්තා කිරීමටද නියමිත බව පොලිසිය සඳහන් කළේය.

පොලිසිය පැවසුවේ අදාළ බස් රථ රියදුරන් දෙදෙනා මත්ද්‍රව්‍ය පරීක්ෂණය සඳහාද යොමු කළ නමුත් පරීක්ෂණ වාර්තා අනුව කිසිදු රියදුරෙකු මත්ද්‍රව්‍ය භාවිත කර නොමැති බවට තහවුරු වී ඇති බවය.