මධ්‍යම කඳුකරයට ඇදහැලෙන අධික වර්ෂාපතනය හේතුවෙන් වික්ටොරියා ජලාශයේ ජල මට්ටම ශීඝ්‍රයෙන් ඉහළ යාම හේතුවෙන් අද (08) එහි ස්වයංක්‍රීය වාන්දොරටු දෙකක් විවෘත වී තිබේ.

​අද ප.ව. 1:16 ට වාර්තා වූ දත්තවලට අනුව ජලාශයේ ජල මට්ටම මුහුදු මට්ටමින් මීටර් 438.04ක් දක්වා ඉහළ ගොස් ඇත.

​මේ අනුව ජලාශයේ පළමු වාන්දොරටුව මීටර් 0.702කින් සහ දෙවන වාන්දොරටුව මීටර් 0.705කින් විවෘත වී ඇති අතර, ඒ ඔස්සේ තත්පරයට මීටර් කියුබ් 159ක (159 m³/sec) ජල ධාරිතාවක් මහවැලි ගඟට මුදාහැරෙමින් පවතී.

​ඒ අනුව මහවැලි ගඟ ආශ්‍රිත පහත් බිම්වල වෙසෙන ජනතාවට විමසිලිමත් වන ලෙසත්, ගඟට බැසීමෙන් හා භාවිතයෙන් වළකින ලෙසත් බලධාරීහු ජනතාවගෙන් ඉල්ල සිටී.