දිට්වා සුළි කුණාටුව හේතුවෙන් ඇති වූ ආපදාවන්ගෙන් විපතට පත්ව සුරක්ෂිත මධ්‍යස්ථාන, කූඩාරම්, ඥාති නිවාසවල ජීවත්වන පවුල් සඳහා අන්තර්කාලීන නිවාස ඉදිකිරීමේ ව්‍යාපෘතිය සඳහා කැබිනට් අනුමැතිය හිමිව තිබේ.

දිට්වා සුළි කුණාටු තත්ත්වයේ බලපෑම හේතුවෙන් ඇති වූ ආපදාවන්ගෙන් පූර්ණ නිවාස හානි 6,088ක් සහ අර්ධ නිවාස හානි 115,179ක් වාර්තා විය. 

මෙම පවුල් අතරින් 2026-04-22 වන විට පවුල් 494ක් දිවයිනේ දිස්ත්‍රික්ක 04ක පවතින සුරක්ෂිත මධ්‍යස්ථාන 20ක් තුළ රැඳී සිටින අතර, තවත් පවුල් සංඛ්‍යාවක් කූඩාරම්වල සහ ඥාති නිවාසවල රැඳී සිටී. 

එමෙන්ම, නායයෑම් හා ගංවතුර හේතුවෙන් තම නිවස අහිමි වී පදිංචි වීමට නිවසක් නොමැති පවුල් වෙත නව නිවසක් ඉදිකර ගන්නා තෙක් කුලී නිවසක පදිංචි වීම සඳහා රුපියල් 25,000/-ක මාසික කුලී දීමනාවක් ලබා දීමට පියවර ගෙන ඇති නමුත්, එම ප්‍රදේශවලින් කුලී නිවාස සපයා ගැනීම ගැටලුවක් බවට පත්වී ඇති බව ද නිරීක්ෂණය වී ඇති බව රජය පවසයි. 

ඒ අනුව, ජාතික ගොඩනැගිලි පර්යේෂණ ආයතනය විසින් ඉදිරිපත් කර ඇති නිවාස සැලැස්ම අනුව ශ්‍රී ලංකා යුද්ධ හමුදාවේ ශ්‍රම දායකත්වය යොදාගනිමින් දිට්වා සුළි කුණාටුව හේතුවෙන් ඇති වූ ආපදාවන්ගෙන් නිවාස හානි වීම හේතුවෙන් කෑගල්ල, මහනුවර, නුවරඑළිය හා බදුල්ල යන දිස්ත්‍රික්කයන්හි සුරක්ෂිත මධ්‍යස්ථාන, කූඩාරම් හා ඥාති නිවාසවල පදිංචිව සිටින පවුල් 1,000ක් සඳහා ස්ථිර නිවාස ඉදිකර පදිංචි වන තෙක් අන්තර්කාලීන නිවාස ඉදි කර දීමේ ව්‍යාපෘතියක් ක්‍රියාත්මක කිරීම පිණිස ආරක්ෂක අමාත්‍ය වශයෙන් ජනාධිපතිවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී