ජාතික හා පළාත් පාසල්වල ගුරුවරුන් මුහුණ දී ඇති ගැටලුවලට විසඳුම් ලබා දෙමින්, ඔවුන්ගේ කාර්යක්ෂමතා කඩඉම් සම්පූර්ණ කිරීම සහ ශ්‍රේණි උසස්වීම් වෙනුවෙන් විශේෂ සහන රැසක් ලබා දීමට රාජ්‍ය සේවා කොමිෂන් සභාව තීරණය කර ඇත.

අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය නිවේදනයක් නිකුත් කරමින් සඳහන් කරන්නේ සංශෝධිත ගුරු ව්‍යවස්ථාව ප්‍රකාරව නව විභාග ක්‍රමය හඳුන්වා දීම හේතුවෙන් පෙර පැවැති මොඩියුල ක්‍රමයට අදාළව කාර්යක්ෂමතා කඩඉම් සම්පූර්ණ කිරීමට නොහැකි වූ ගුරුවරුන්ට මෙම සහන හිමිවන බවයි.

ඒ අනුව, 2022 ඔක්තෝබර් 23 වනදා සිට 2025 ජුනි 30 දක්වා කාලය තුළ ගුරු සේවයේ පළමු (I) ශ්‍රේණියට උසස්වීම් හිමිවන ගුරුවරුන්, තෙවන කාර්යක්ෂමතා කඩඉම III සම්පූර්ණ කිරීමේ අවශ්‍යතාවයෙන් නිදහස් කෙරෙන අතර පූර්ව කාර්යක්ෂමතා කඩඉම් ඊළඟ උසස්වීමට පෙර සම්පූර්ණ කිරීමේ කොන්දේසිය මත උසස්වීම් ලැබූ නිලධාරීන් ද එම අවශ්‍යතාවයෙන් නිදහස් කිරීමට තීරණය කර ඇත.

මීට අමතරව, 2025 ජුනි 30 වනදා සිට අදාළ කාර්යක්ෂමතා කඩඉම් විභාග ගැසට් කරන ලද දින දක්වා කාලය තුළ ශ්‍රේණි උසස්වීම් ලැබීමට නියමිත නිලධාරීන්ට ද මොඩියුල හෝ කඩඉම් විභාග සම්පූර්ණ කිරීම නොසලකා ශ්‍රේණි උසස්වීම් ලබා දීමට තීරණය කර තිබේ.

මේ පිළිබඳව සියලු පාර්ශ්වයන් නිල වශයෙන් දැනුවත් කරමින් අදාළ අධ්‍යාපන චක්‍රලේඛය ඉදිරියේදී නිකුත් කිරීමට නියමිත බව අධ්‍යාපන අමාත්‍යාංශය වැඩිදුරටත් සඳහන් කරයි.