වෘත්තීය ශ්‍රව්‍ය-දෘශ්‍ය (audio-visual) ක්ෂේත්‍රයේ පුළුල් විශේෂඥ දැනුමකින් යුත් ප්‍රමුඛ පෙළේ සමාගමක් වන Arrow Technologies, ශ්‍රී ලංකාව තුළ Sennheiser Professional නිෂ්පාදන සඳහා බලයලත් බෙදාහරින්නා ලෙස පත් කර ඇත. මෙම සහයෝගිතාවයේ මුල් පියවරක් ලෙස, Sennheiser Professional හි නවතම වෘත්තීය ශ්‍රව්‍ය තාක්ෂණයන් ප්‍රදර්ශනය කෙරෙන තාක්ෂණික වැඩමුළුවක් පසුගියදා Arrow Technologies විසින් සංවිධානය කරන ලදී. ශබ්ද ඉංජිනේරුවන්, සංගීතඥයින් සහ විකාශන (broadcasting) ක්ෂේත්‍රයේ වෘත්තිකයන් වෙනුවෙන්ම සැකසුණු මෙම වැඩමුළුව, Sennheiser ආයතනයේ විශේෂඥ නියෝජිතයෙකු විසින් මෙහෙයවන ලද පුහුණු සැසියකින් සමන්විත විය. මෙම වැඩසටහන දියත් කරනු ලැබුවේ, ශ්‍රව්‍ය සහ දෘශ්‍ය නිෂ්පාදන සහ බෙදාහැරීමේ ක්ෂේත්‍රයේ ප්‍රමුඛතම ආයතනයක් වන සිංගප්පූරුවේ M-Global Pvt Ltd සමඟ ඇතිකරගත් හවුල්කාරිත්වයක් හරහාය.

ශ්‍රව්‍ය-දෘශ්‍ය (AV) තාක්ෂණය වේගයෙන් විකාශනය වෙමින් පවතින පසුබිමක, ශ්‍රී ලාංකීය වෙළඳපොළට ලෝක මට්ටමේ විසඳුම් ගෙන ඒම සඳහා Arrow Technologies අඛණ්ඩව කැපවී සිටී. Sennheiser Professional හි නිල දේශීය නියෝජිතයා ලෙස, එම සන්නාමයේ වඩාත් නවීන හා සංකීර්ණ පද්ධති පිළිබඳව ප්‍රායෝගික හා පුළුල් අවබෝධයක් දේශීය වෘත්තිකයන්ට ලබා දීමේ අත්‍යවශ්‍යතාව සමාගම විසින් හඳුනාගෙන ඇත.

ආසියානු කලාපයේ Sennheiser Professional කාර්යාලයේ තාක්ෂණික යෙදුම් ඉංජිනේරු (APAC වෘත්තීය ශ්‍රව්‍ය අංශයේ) කළමනාකරු Kenan Phang මහතා විසින් මෙහෙයවන ලද මෙම වැඩමුළුවේදී, දේශීය සංගීතඥයින්ගේ, විකාශකයන්ගේ සහ ශබ්ද ඉංජිනේරුවන්ගේ දෛනික කටයුතු සඳහා අත්‍යවශ්‍ය වන ඉහළ ක්‍රියාකාරීත්වයකින් යුත් රැහැන් රහිත මයික්‍රෆෝන (wireless microphones) සහ ඉන්-ඉයර් මොනිටර්ස් (in-ear monitors) පිළිබඳව විශේෂ අවධානයක් යොමු කරන ලදී. තවද, රියැලිටි රූපවාහිනී වැඩසටහන්, රූපවාහිනී විකාශන මධ්‍යස්ථාන, ශබ්ද ඉංජිනේරුවන්, සංගීතඥයින්, පද්ධති ඒකාබද්ධ කරන්නන් (System Integrators) සහ ශබ්ද උපකරණ කුලියට දෙන සමාගම්වල කාර්ය විප්ලවීය වෙනසකට ලක් කිරීම සඳහාම නිර්මාණය කර ඇති, රැහැන් රහිත මයික්‍රෆෝන සහ මොනිටරින් පහසුකම් එක්තැන් කළ Sennheiser හි නවීනතම ඒකාබද්ධ විසඳුමක් හඳුන්වා දීමටද Arrow Technologies සූදානමින් සිටී.

"මගේ පියා විකාශන ශ්‍රව්‍ය-දෘශ්‍ය (AV) ඉංජිනේරු තාක්ෂණයේ පුරෝගාමියෙක්. ඔහුගේ එම මෙහෙවරින් ආභාසය ලබා ගනිමින්, 2000 වසරේදී මා මෙම ක්ෂේත්‍රයට පිවිසුණා,” යැයි Arrow Technologies හි නිර්මාතෘ සහ කළමනාකාර අධ්‍යක්ෂ ධනුෂ්ක ප්‍රනාන්දු මහතා සඳහන් කළේය. "පසුගිය දශක දෙකක කාලය තුළ මාගේ ප්‍රධාන අරමුණ වූයේ ජාත්‍යන්තර ප්‍රමිතියේ ශබ්ද තත්ත්වයක් ළඟා කර ගැනීම සඳහා අවශ්‍ය උපකරණ සහ දැනුම සංගීතඥයින්ට සහ ඉංජිනේරුවන්ට ලබා දෙමින්, තාක්ෂණික පුහුණුව හරහා ඔවුන්ව සවිබල ගැන්වීමයි. ගෝලීය නවෝත්පාදන සහ අපගේ දේශීය විකාශන සහ විනෝදාස්වාද අංශ අතර ඇති පරතරය පියවීමේ අරමුණින් Arrow Technologies බිහිවූයේ මෙම දැඩි කැපවීම තුළිනුයි."

M-Global Pte Ltd හි කළමනාකාර අධ්‍යක්ෂ චන්දන් මහතානි සමඟ ඇති කරගත් උපායමාර්ගික හවුල්කාරිත්වය, ලොව පුරා පිළිගත් AV සන්නාම සහ දේශීය වෙළඳපොළ අතර ඇති පරතරය පියවීම සඳහා බෙහෙවින් ඉවහල් වී ඇති බව ධනුෂ්ක ප්‍රනාන්දු මහතා වැඩිදුරටත් අවධාරණය කළේය. මෙම සහයෝගීතාවය හරහා, ජාත්‍යන්තර මට්ටමින් භාවිතා වන උසස් උපකරණ සඳහා දේශීය වෘත්තිකයන්ටද ප්‍රවේශය ලබා දෙමින්, යුරෝපයේ නිෂ්පාදිත ඉහළම තත්ත්වයේ ශ්‍රව්‍ය-දෘශ්‍ය විසඳුම් රාශියක් ශ්‍රී ලංකාවට හඳුන්වා දීමට Arrow Technologies සූදානමින් සිටී.

ඉදිරියේදී, ඉතා ඉහළ තත්ත්වයේ AV විසඳුම් ලබා දෙමින් දේශීය කර්මාන්තයේ ප්‍රධානතම ආධාරකයක් බවට පත්වීම Arrow Technologies හි අරමුණයි. Sennheiser, Proel, Axiom, Beyerdynamic, FunkTechnik, PreSonus, Eikon, Tamburo, Die-Hard, Fostex, BeamZ Lighting සහ Power Dynamics යන සමාගම් සමඟ අඛණ්ඩ හවුල්කාරිත්වයකින් යුතුව, මෙම විශේෂිත පුහුණු වැඩසටහන් වාර්ෂිකව පැවැත්වීමටද සමාගම සැලසුම් කර ඇත. මෙම උත්සාහයන් දේශීය රියැලිටි ටීවී හා සජීවී විකාශන නිෂ්පාදන ගුණාත්මකභාවය ඉහළ නැංවීමට නිර්මාණය කර ඇති අතර, ශබ්දය සහ දෘශ්‍ය ගුණාත්මකභාවය යන දෙකම සඳහා දැඩි ජාත්‍යන්තර ප්‍රමිතීන්ට ගැළපෙන පරිදි ඒවා පවත්වා ගැනීමට දායක වේ.