පොසොන් පෙරහැර කිහිපයක් පැවැත්වීම හේතුවෙන් අද (29) සහ ඉදිරි දිනයන්හි මාතර දිස්ත්‍රික්කයේ මාර්ග කිහිපයක රථවාහන ගමනාගමනය සීමා කිරීමට නියමිත බව පොලීසිය දැනුම් දෙයි.

කෝන්දෙණිය අශෝකාරාම විහාරස්ථානයේ පොසොන් පෙරහර අද (29) රාත්‍රී 7.00ට ආරම්භ වීමට නියමිත අතර, පෙරහර විහාරස්ථානයෙන් ආරම්භ වී කොන්දෙණිය හන්දිය, පරණ බෙලිඅත්ත මාර්ගය ඔස්සේ දික්වැල්ල නගරය දක්වාත්, කොළඹ - කතරගම ප්‍රධාන මාර්ගය ඔස්සේ තංගල්ල දෙසටත් ගමන් කර නැවත විහාරස්ථානයට පැමිණීමට නියමිතය.

එම කාලය තුළ කොළඹ - කතරගම ප්‍රධාන මාර්ගයේ කොටසක් වසා තැබෙන බැවින් රියැදුරන්ට විකල්ප මාර්ග භාවිත කරන ලෙස පොලීසිය දැනුම් දෙයි.

එමෙන්ම රත්මලේ ප්‍රදේශයේ පැවැත්වෙන පෙරහැරක් හේතුවෙන් රත්මලේ, රදම්පල සහ අවට මාර්ගවලද ගමනාගමන සීමා කිරීම් සිදු කිරීමට නියමිතය.

වලස්ගල ශ්‍රී ජයවර්ධන මුචලින්දාරාම විහාරස්ථානයේ පොසොන් පෙරහර 2026 ජූලි 01 වන දින පෙරවරු 10.00 සිට වීථි සංචාරය කිරීමට නියමිත අතර, එම අවස්ථාවේදී වලස්ගල, බෙලිඅත්ත, දික්වැල්ල ඇතුළු ප්‍රදේශවල මාර්ග කිහිපයක රථවාහන ගමනාගමනයට බලපෑම් ඇති විය හැක.

ඒ අනුව පෙරහැර ගමන් කරන කාලසීමාව තුළ අදාළ විකල්ප මාර්ග භාවිත කරන ලෙස රියැදුරන්ගෙන් සහ මහජනතාවගෙන් පොලීසිය ඉල්ලා සිටී.