විශේෂාංග

වැඩිම මුදලකට අලෙවි වූ විශාලතම චිත්‍රය

ලොව විශාලතම කැන්වසයෙන් ඇඳි සිතුවම පසුගියදා ඩොලර් මිලියන ගණනකට ඩුබායිහිදී වෙන්දේසි වී තිබුණි. මෙය ජීවමාන කලාකරුවෙක් විසින් වෙන්දේසියකදී විකුණන ලද පළමු මිල අධිකම සිතුවම ලෙසත් ගිනස් ලෝක වාර්තාවක් තැබිය.

බ්‍රිතාන්‍ය ජාතික චිත්‍ර ශිල්පී සාචා ජෆ්රි විසින් අඳින ලද මෙම චිත්‍රය නම් කර තිබුණේ ‘ද ජර්නි ඔෆ් හියුමනිටි’ ලෙසිනි.

කොරෝනා වසංගතය ලොවපුරා ව්‍යාප්ත වීමත් සමග රටවල් රැසක් සංචරණ සීමා පැනවිය. ඒ නිසා බ්‍රිතාන්‍යයට නැවතත් යාමට නොහැකිව සාචා ඩුබායි රාජ්‍යයේ හෝටල් කාමරයක නවාතැන් ගත්තේය. එසේ හෝටල් කාමරයක කොටුවී සිටි මාස හත පුරා ඔහු විශේෂ කාර්යයක් සඳහා නිරත විය. ඔහු ඒ සඳහා මේ හෝටලයේ එක් බෝල්රූම් ශාලාවක් මිලදී ගත්තේය. එමෙන්ම, ඔහු එම ශාලාවේ පොළොව වැසෙන සේ කැන්වස් රෙදි කැබැල්ල ඇතිරුවේය.

ඉන්පසුව, මෙහි තීන්ත බුරුසු එක්දහස් හැට පහක් සහ තීන්ත ලීටර් හයදහස් තුන්සියයක්ද යොදා ගනිමින් විවිධ ආකාරයේ රටා මවා මුළු කැන්වස් රෙදි කැබැල්ලම වැසෙන සේ විවිධ සිතුවම් ඇන්දේය. එමෙන්ම, මෙම කැන්වසයේ ප්‍රමාණය පාපන්දු පිටි දෙකකට වඩා විශාල බවත් බ්‍රිතාන්‍ය ජාතික චිත්‍ර ශිල්පී සාචා ජෆ්රි කියා තිබුණි.

මෙසේ මාස හතක පුරා ඇඳි සිතුවම කොටස් හැත්තෑවකට කැබලි කර විකිණීමට ඔහු සිතුවේය. ඒ සඳහා පසුගියදා ඔහු එම හෝටලයේදී සිතුවම් ප්‍රදර්ශනයක් සහ චිත්‍ර වෙන්දේසියක් පැවැත්වූහ. එය නැරඹීමට මෙන්ම මෙම විශාල සිතුවමේ එක් කොටසක් හෝ තමන් සතු කරගැනීමට බොහෝදෙනා පැමිණ සිටියහ. ඒ මොහොතේදී විශාල ජනකාය දැක ඔහු සිතුවේ අවම වශයෙන් සිතුවම කොටස් කර හෝ විකුණා ඩොලර් මිලියන තිහක්වත් එකතු කර ගැනීමටය.

නමුත්, ඔහුව පුදුමයට පත්කරමින් මේ අය අතර සිටි ඔන්ලයින් මුදල් ඒකක හසුරුවන ව්‍යාපාරයක් ඇති ඩුබායි හි වෙසෙන ප්‍රංශ ජාතික ඇන්ඩ්‍රේ අබ්දූන් විසින් සිතුවමේ එක් කොටසක් නොව මුළු සිතුවම ම මිලදී ගත්තේය. ඒ ඇමරිකානු ඩොලර් මිලියන හැට තුනකටය.

කෙසේවෙතත්, මාස හතකට අධික කාලයක් වර්ග මීටර් එක්දහස් අටසියයක් පුරා විහිදී යන සේ ඇදී සිතුවමෙන් ඉපැයූ මුදල් ඔහු විසින් සිය පොකැට්ටුවට දමා ගත්තේ නැත. ඔහු මේ සියලුම මුදල් එක්සත් ජාතීන්ගේ ළමා අරමුදලටත්, මන්දපෝෂණයෙන් පෙළෙන දරුවන් වෙනුවෙනුත් සහ සිතුවම් ඇදීමට කැමති වුවත් ඒ සඳහා වියදම් කිරීමට මුදල් නොමැති දරුවන් වෙනුවෙන්ත් පරිත්‍යාග කළේය.

හර්ෂණී දිසානායක