සිය අපරාජිත බව රැකගනිමින් ඉකුත් ශූර මැලේසියාවේ අපරාජිත බවට පහරදුන් ශ‍්‍රී ලංකාව 11 වැනි ආසියානු දැල්පන්දු ශූරතාවලියේ සුපිරි කණ්ඩායම් හතර යටතේ දෙරට අතර පැවැති තරගයෙන් ලකුණු 62-59 කින් ජය වාර්තා කිරීමට සමත් විය. තරගාවලියට සහභාගී වී සිටින ප‍්‍රබලතම කණ්ඩායමක් වන ශ‍්‍රී ලංකාව සුපිරි කණ්ඩායම් හතර යටතේ සහභාගී වූ පළමු තරගයේදී සත්කාරක සිංගපූරුව හමුවේ ලකුණු 74-61 ක ජයක් ලැබීය. ඒ අනුව ශ‍්‍රී ලංකාව සහභාගී වන සුපිරි කණ්ඩායම් අතර අවසන් තරගය හොං කොං සමගින් හෙට ප.ව. 2.30 ට පැවැත්වේ. කණ්ඩායම් 12 ක් තරග වඳින මෙවර තරගාවලියේ ‘බී’ කාණ්ඩයෙන් තරගාවලියට පිවිසි ශ‍්‍රී ලංකාව එම කාණ්ඩයේ අපරාජිතව මුල් තැන හිමිකර ගනිමින් ‘ඊ’ කොටස හෙවත් සුපිරි කණ්ඩායම් හතර අතරට පිවිසියේය.