brand logo

ශ්‍රී ලංකාව දැන් සම්පූර්ණයෙන් සුරක්ෂිතයි - වික්ටෝරියා ප්‍රාන්ත පාර්ලිමේන්තු මන්ත්‍රී ක්‍රෙයිග් ඔන්ඩච්චි

07 June 2019

පසුගියදා සිදුවූ ත්‍රස්ත ප්‍රහාර හමුවේ පලුදු වී තිබූ ශ්‍රී ලංකාවේ ආරක්ෂාව සහ සුරක්ෂිතභාවය පිළිබද ගැටළුව මේ වනවිට සම්පූර්ණයෙන් පහව ගොස් ඇති බවත්, මේ වනවිට දිවයින නැවතත් පෙර තිබූ පරිදි සම්පූර්ණයෙන්ම සුරක්ෂිත බවත්, ඕස්ට්‍රේලියාවේ මෙල්බන් නුවර වික්ටෝරියා ප්‍රාන්ත පාර්ලිමේන්තු මන්ත්‍රී ක්‍රෙයිග් ඔන්ඩච්චි මහතා අවධාරණය කරයි. ඒ මහතා මෙම අදහස් පලකළේ, පසුගියදා විදුලිබල, බලශක්ති සහ ව්‍යාපර සංවර්ධන අමාත්‍ය රවී කරුණානායක මහතා සමග එම අමාත්‍යාංශ පරිශ්‍රයේදි පැවති නිල සාකච්ඡාවකදීය. විදුලිබල අමාත්‍යවරයා සමග පැවති සාකච්ඡාවේදී පාර්ලිමේන්තු මන්ත්‍රී ක්‍රෙයිග් ඔන්ඩච්චි මහතා, මේ වනවිට ශ්‍රී ලංකාව ආරක්ෂාව අතින් සම්පූර්ණයෙන් සුරක්ෂිතවී ඇති බවත්, එබැවින් පෙර පරිදි සංචාරක කටයුතු මෙන්ම ආයෝජන කටයුතු වෙනුවෙන් දිවයිනට පැමිණීමට බිය නොවන ලෙස ලෝකයේ සෙසු රටවලට විවෘත නිවේදනයක් නිකුත් කරමින් පවසා සිටියේය. එමෙන්ම ශ්‍රී ලංකාවේ විදුලිබල ක්ෂේත්‍රයේ උන්නතිය වෙනුවෙන් යොදාගත හැකි නවීන තාක්ෂණික ක්‍රමවේදයන් පිළිබදවද මෙහිදී පාර්ලිමේන්තු මන්ත්‍රීවරයා ශ්‍රී ලංකාවේ විදුලිබල අමාත්‍යවරයා සමග සාකච්ඡා කළ අතර ඉදිරියේදී ශ්‍රී ලංකාවේ විදුලිබල, බලශක්ති ක්ෂේත්‍රයන්හි ආයෝජනයන් කෙරෙහි යොමුවීම කෙරෙහිද සලකා බලන බව පැවසීය. එසේම තම රටේ යොදාගනු ලබන නවීන තාක්ෂණික උපක්‍රම මෙන්ම සංවර්ධන ව්‍යාපෘති දැකබලා ගැනීම පිණිස තම රටට පැමිණෙන ලෙසද ඕස්ට්‍රේලියානු පාර්ලිමේන්තු මන්ත්‍රී ක්‍රෙයිග් ඔන්ඩච්චි මහතා, අමාත්‍ය කරුණානායක මහතාට ආරාධනාවක්ද කළේය. ඔන්ඩච්චි මහතාගේ දෙමව්පියන් ශ්‍රි ලාංකිකයන් වන අතර ඔහු ඉපදී ඇත්තේ ඕස්ට්‍රේලියාවේදීය. සිංහල සම්භවයක් ඇති මෙම ඕස්ට්‍රේලියානු මන්ත්‍රීවරයා, පාස්කු ප්‍රහාරයෙන් ශ්‍රී ලංකාවේ ආරක්ෂාව පිළිබදව ඇතිවූ ගැටළු සහගත තත්ත්වය මේ වනවිට පහව ගොස් ඇති බවට ලෝකයේ සෙසු රටවලට ඔප්පු කර පෙන්වීම පිණිස ශ්‍රී ලංකාවේ සංචාරකයට සහභාගි වීම පිළීබදව අමාත්‍ය කරුණානායක මහතා ඔන්ඩච්චි මහතාට ශ්‍රී ලංකාව වෙනුවෙන් සිය කෘතඥතාවය පළකර සිටියේය.
 

More News..