සංචාරක හා ව්‍යාපාරික වීසා මත මෙරටට ඇතුළුවන නයිජීරියානු ජාතිකයන්ට වීසා නිකුත් නොකිරීමට ආගමන හා විගමන දෙපාර්තමේන්තුව තීරණය කර ඇති බව එහි මාධ්‍ය ප්‍රකාශක හා පාලන (ප්‍රතිපත්ති හා සංවර්ධන) නියෝජ්‍ය කොමසාරිස් දසිත නිරෝෂණ පැවසීය. ගෙවුණු කාලයේ රට තුළ සිදු වූ පරිගණක අපරාධ හා වංචා සම්බන්ධයෙන් ලැබුණු පැමිණිලි මත මෙම තීරණයට එළැඹ තිබේ. මෙලෙස පැමිණෙන නයිජීරියානු ජාතිකයන් සඳහා මෙරට කිසිවකු ඇප නොවේ නම් ඔවුනට වීසා නොලැබෙනු ඇත. පසුගිය වර්ෂයේ මෙරට පැමිණි නයිජීරියානු ජාතිකයන්ගෙන් තුනෙන් එකක්ම නීතිවිරෝධී ක්‍රියාවන්ට සම්බන්ධ වී ඇති බවට හෙළි වී ඇත. සංචාරක වීසා මත එසේ පැමිණි නවසීයෙන් දෙසීය අනූහයක්ම නොයෙකුත් ජාවාරම්වලට සම්බන්ධ වී ඇත. ඉන් සියයකට පමණ පොලිසියෙන් නඩු දමා ඇති අතර තවත් නයිජීරියන් ජාතිකයන් 32 ක් රැඳවුම් නියෝග මත ආගමන විගමන දෙපාර්තමේන්තුව යටතේ ඇති රැඳවුම් කඳවුරේ සිටින බවද නිරෝෂණ පැවසීය. චමින්ද සේනාරත්න