brand logo

වාහන දසදහසක් පොලිසිවල දිරයි

25 September 2021

වාහන හිමියන් අධිකරණ අමාත්‍යාංශයෙන් ඉල්ලීමක් කරයි

පොලිසිය මගින් අත්අඩංගුවට ගෙන එම ස්ථානවල හා අධිකරණයට ඉදිරිපත් කර රඳවාගෙන සිටින වාහන බැඳුම්කරයක් මත මුදාහරින ලෙස එම වාහන හිමියන් අධිකරණ අමාත්‍යාංශයෙන් ඉල්ලා සිටී. රට පුරා පිහිටි මහෙස්ත්‍රාත් අධිකරණ පනස් එකක (51) රාජසන්තක කර ඇති වාහන හා පොලිස් ස්ථාන භාර සියයකට වැඩි ප්‍රමාණයක වාහන දසදහසකට අධික ප්‍රමාණයක් රඳවාගෙන ඇති බව වාර්තා වේ. යතුරු පැදි ත්‍රිරෝද රථ, කාර්, වෑන්, ලොරි, සුඛෝපභෝගි වාහන, ඉඩම් වාහන ඇතුළු වාහන වැඩිවශයෙන් පොලිස් ස්ථානවල රඳවාගෙන ඇත. මාරක රිය අනතුරු, මංකොල්ලකෑම්වලට සම්බන්ධ වාහන, මත්ද්‍රව්‍ය පැමිණිලිවලට සම්බන්ධ ආදි නඩු භාණ්ඩවලට සම්බන්ධ නොවන වාහන බැඳුම්කරයක් මත නිදහස් කළ හැකි බව නීතිවේදීහු පවසති. කෙසේ වෙතත් පොලිසියේ ඇතැම් නිලධාරීන් නීතිය සම්බන්ධයෙන් නොදැනුවත්කම, හිතාමතාම ප්‍රමාද කිරීම නිසා වාහන අත්අඩංගුවට ගෙන රඳවාගනිමින්, අධිකරණයට අසත්‍ය කරුණු ගොනු කිරීම නිසා මෙසේ පොලිස් ස්ථානවල වාහන ගොඩගැසී වසර ගණන් දිරාපත් වෙමින් විනාශ වෙමින් පවතියි. මේ සම්බන්ධයෙන් අධිකරණ අමාත්‍යාංශයේ ලේකම් නීතිඥ එම්.එම්.ජී.කේ. මායාදුන්නගෙන් කළ විමසීමේදී ඔහු සඳහන් කළේ මෙම කාරණය සම්බන්ධයෙන් අමාත්‍යාංශයේ අවධානය යොමු වී ඇති නිසා කඩිනමින් එම වාහන අයිතිකරුවන්ට බැඳුම්කරයක් මත නිදහස් කිරීමට අවශ්‍ය කටයුතු පිළිබඳ අධ්‍යයනයක් ආරම්භ කර ඇති බවයි. චමින්ද සේනාරත්න
 

More News..