ජාතික ගමනාගමන මණ්ඩලයේ සභාපතිවරයා සම්බන්ධයෙන් ජනාධිපති ගෝඨාභය රාජපක්ෂ සමග සාකච්ඡා කර අවසන් තීරණයක් ගන්නා බව මගී ප්‍රවාහන කර්මාන්ත අමාත්‍ය මහින්ද අමරවීර පවසයි.

අමාත්‍යාංශය විසින් පවත්වන රැස්වීම මග හැරීම, සහ ගමනාගමන මණ්ඩලයේ විනය විරෝධී ක්‍රියා නතර කිරීමට අපොහොසත් වීම, බස් රථ ධාවනය වැඩිදියුණු කිරීමේ නියෝග මග හැරීම යන චෝදනා සභාපතිවරයාට එරෙහිව පවතින බව අමාත්‍යවරයා පෙන්වා දෙයි. සභාපතිවරයා ඉවත් කිරීමට ජනාධිපතිවරයා තීරණය කළ හොත් එම තනතුර සඳහා විශ්‍රාමික හමුදා නිලධාරියකු පත් කිරීමටද අමාත්‍යවරයා තීරණය කර ඇත.

ඇතැම් ඩිපෝවල වෘත්තිය සමිති නායකයන්ට පහරදීම, ඩිපෝ අධිකාරිවරුන් පලවා හැරීම් වැනි සිදුවීම් වාර්තා වී තිබේ. මෙවැනි විනය විරෝධී ක්‍රියා නතර කිරීමට පියවර ගන්නා ලෙස අමාත්‍යංශය සභාපතිවරයාට දැනුම් දී ඇතත්, එවැනි ක්‍රියා තවමත් සිදු වන වාර්තා වී ඇත. ලංකා ගමනාගමන මණ්ඩලය සතුව බස් රථ 6000ක් පමණ තිබේ. නමුත් දෛනිකව ධාවනය වන්නේ බස් රථ 5300ක් පමණි. මෙම බස් රථ වල යෝග්‍යතාව පිළිබඳව පරීක්ෂා කර බලා අමාත්‍යාංශයට යොමු කරන ලෙස සභාපතිවරයාට දැනුම් දී ඇත. නමුත් ඒ පිළිබඳව මෙතෙක් සොයා බැලීමක් සිදු කර නොමැති බවද අමාත්‍යවරයාට වාර්තා වී තිබේ.

උදයජීව ඒකනායක