කියුබානු විප්ලවවාදී නායක ෆිදෙල් කැස්ත්‍රෝ සිය ජීවිතයේ පරමාදර්ශය බවට පත් කරගත් ඩියෝගෝ මැරඩෝනා සිය දිවිගමන අවසන් කළේය. ආර්ජෙන්ටිනාවේ පාපන්දු පුරාවෘත්තිය වන මැරඩෝනා ප්‍රසිද්ධියේ ප්‍රකාශ කරන ලද්දේ ෆිදෙල් කැස්ත්‍රෝ සිය ‘දෙවැනි පියා’ ලෙස සලකන බවත්, දේශපාලනයට එක්වෙන ලෙස තමාගෙන් ෆිදෙල් වරක් ඉල්ලා සිටි බවත්ය. වයස අවුරදු 60ක් සපුරමින් සිටියදී පසුගිය බදාදා (25 වැනිදා) මියගිය මැර​ඩෝනාට කිසිවිටෙකත් ෆිදෙල්ගේ එම දේශපාලන අභිලාෂය ඉටුකිරීමට නොහැකි වූ නමුත් ලතින් ඇමෙරිකාව පුරා විසිරී සිටින කැස්ත්‍රෝ, වෙනිසියුලාවේ හියුගෝ චාවේස් සහ බොලිවියාවේ ඉවෝ මොරාලෙස් වැනි නායකයන් දිනා ගැනීමට සමත් විය. එසේම ඔවුන් හරහා පුළුල් අන්තර්ජාතික අවධානයක් ලබා ගැනීමටත් මැරඩෝනා කටයුතු කළේය. ‘‘ෆිදෙල් සහ චාවේස් දෙදෙනාම මා වෙනුවෙන් සෑම විටම හොඳම දේ කර ඇත.’’ යනුවෙන් 2007දී හියුගෝ චාවේස් සහභාගි වන සතිපතා රූපවාහිනි වැඩසටහනකදී පැවසීය. ‘‘මම එක්සත් ජනපදයෙන් එන සෑම දෙයකටම වෛර කරනවා. මම මගේ මුළු ශක්තියෙන්ම එක්සත් ජනපදයට වෛර කරනවා’’ යැයි මැරඩෝනා එහිදී ෆිදෙල් සහ චාවේස් අනුව යමින් පැවසීය. බුවනෝස් අයර්ස් නගරාසන්නයේ පැල්පත් ප්‍රදේශයක හැදී වැඩුණු මැරඩෝනා පසුව මත්ද්‍රව්‍යවලට ඇබ්බැහි වී විවිධ චෝදනා ලැබුවද දේශපාලනිකව කොමියුනිස්ට් කියුබාවට ගරු කළේය. ඔහු සිය ජීවිත කාලය පුරාම තමා කොමියුනිස්ට් වාදියකු බව සැබෑවටම ප්‍රදර්ශනය කළේය. එසේම ඇතැම් බටහිර විචාරකයෙන් මැරඩෝනා යනු ලතින් ඇමෙරිකානු වාමාංශික නායකයන්ගේ ප්‍රචාරක මෙවලමක් සේද හැඳින් වූහ. ඔහු ඕනෑම ප්‍රතිචාරයකට මුහුණදීමට ශක්තිය සහිත පුද්ගලයකු ලෙසද ඔවුහු මැරඩෝනා නම් කළහ. එවැනි කොමියුනිස්ට්වාදියකු වූ මැරඩෝනා දෛවයේ සරදමකට මෙන් මීට වසර ​04කට පෙර ඔහුගේ පිළිමය නිරාවරණය කළ නොවැම්බර් 25දාකම මියගියේය. නයන තරංග ගමගේ