මේරියන්ස් සංගීත කණ්ඩායමේ නායක නලින් පෙරේරාගේ දියණිය ස්වේතා මේලි පෙරේරාගේ මංගල උත්සවය පසුගියදා උත්කර්ෂවත් අන්දමින් පැවැත්වුණා. ස්වේතා මේලිගේ අතිනත ගත් මනාලයා වූයේ රනිත් දිමිත්‍ර. දුවෙක්ගේ ආදරේ තදින්ම දැනෙන්නේ තාත්තාට කියලා කියනවනේ. ඒ නිසාම තමන් ඇස් දෙක වගේ ආදරෙන් අවුරුදු 27ක් බලාගත් දුව විවාහයත් සමගම ගෙදරින් පිට වෙද්දී දැනුණු හැඟීම ගැන නලීන්ගෙන් අහන්න හිතුණා. ඒ හැඟීම වචනවලට පෙරළන්න නම් අමාරුයි. මට දැනුණේ ශරීරයෙන් හදවත එළියට අරන් යනවා වගේ හැඟීමක්. මොකද දුව මගෙත් එක්ක හරිම සමීපයි. ගෙදර සීනුව වගේ ඉන්නේ දුව. එයා වෙනුවෙන් මම ලස්සන සිංදුවකුත් කළා. මම කිව්වේ ඒකයි මගේ හුස්ම ටික එයා. "ඔය සුදු මුහුණේ- මට මාව පෙනේ ඔබේ හදගැස්මේ- මගේ හුස්ම ඇසේ " මට එතනින් එහාට කියන්න දෙයක් නැහැ ඉතින්. විවාහයෙන් පස්සේ ඒ දෙන්නා විදෙස්ගත වුණා. ඒකත් දරා ගන්න අමාරුයි. මොනවා කරන්න ද ජීවිතේ අතහැරීම තමයි තේරුම් ගන්න තියෙන්නේ අපිට. පියෙක් හැටියට සතුටයි දුකයි දෙකම එකතු වුණු තැනක්. එයා පතපු විදියට හැමදේම සිද්ධ වුණා. ලස්සනට හැමදෙයක්ම සිදු වුණා. wedding mass එක හරිම ලස්සනට ගියා. රූකාන්ත - චන්ද්‍රලේඛා, කසුන් කල්හාර ගායනා කළා. ක්ෂේත්‍රයේ උදවිය යාළු හිතමිත්‍රාදීන් ආවා. හැමදේම හොඳින් සිද්ධ වුණා. මගේ අත කැඩුණා හා සමානයි. අපි දරුවන් උස් මහත් කරලා ඔය තත්ත්වයට ගෙනාවට පස්සේ ඒ ගොල්ලෝ කියන දේ තමයි අපි කෙරුවේ. විශේෂයෙන් මම කෙරුවේ. මගේ පිටුපස ඉඳන් එයයි අම්මයි තමයි මම මොනවද කරන්නේ, මම මොනවද අඳින්න ඕනේ, කතා කරන්න ඕනේ කියලා කියන්නේ. ඒවා මගේ ජීවිතේට එකතු වුණු අලුත් දේවල් වුණා. නමුත් ඉතින් ඒවා නැතිම වෙන එකක් නැහැ. නමුත් ළඟ නැතිවෙන එකත් එක්ක ටික කාලයක් යයි මට හිත හදාගෙන ජීවත් වෙන්න. එයා දුක සැප හැමදේම ළඟින්ම බෙදා ගත්තු චරිතයක්. ස්වේතා අධ්‍යාපන කටයුතුවලට මුල් තැන දීලා ඒ කටයුතු හොඳින් අවසන් කළා. ඒ අතරතුර තමයි මගෙත් එක්ක වැඩසටහන්වලට එහෙම සහභාගී වුණේ. ස්වේතා දුව හරිම විනෝදකාමී රසාස්වාදයක් තියෙන කෙනෙක්. ඩාන්ස් කරන්න සින්දු කියන්න ආස කෙනෙක්. එයාගේ විදියටම ගැළපෙන හස්බන්ඩ් කෙනෙක් එයාට හම්බ වුණා. රනිත් පුතා මුලින්ම අපි හොයලා දුන්නු කෙනෙක්. පසුව ඒ අය ඒක ආදර සම්බන්ධයක් බවට පත් කරගත්තා. ඒක යෝජනාවක්ම කියන්නත් බැහැ, රනිත් පුතාගේ අම්මාව මම පොඩි කාලේ ඉඳන්ම දන්නවා. එයාල හලාවත. මම කිව්වේ ඔය ගොල්ලෝ මුලින්ම හඳුනා ගන්න. ඔය දෙන්නට හොඳ නම් ඔය දෙන්නා ආදර සම්බන්ධතාවක් පටන් ගන්න කියලා. ඉතින් කාලයත් එක්ක ඒ අයම කතා බහ කරලා තීරණය කළා ඒ දෙන්නට දෙන්නා ගැළපෙනවා කියලා. හැමදේම සරලව සුන්දරව සිද්ධ වුණා. මම කවදාවත් කිසිම දෙයක් ගැන දරුවන්ට බලකරලා කියන කෙනෙක් නෙවෙයි. ඒ අයගේ කැමැත්තට ඉඩ දුන්නේ. දුවට දෙන උපදෙස මොකක් ද කියලා ඇහුවොත්..... දුවට ඇතිවෙන්න පාඩම් මගේ ජීවිතෙන් සහ මගේ බිරිඳගේ ජීවිතෙන් ගන්න තියෙනවා. අඩුපාඩු වැරදි සියල්ල සිද්ධ වෙන්නේ මනුෂ්‍යයන්ට. ඒවා ඉවසගෙන මුහුණ දෙන එක තමයි පවුල් ජීවිතේක තියෙන්න ඕනේ බලවත්ම දේ. ඒක මම හිතනවා මගේ දුව ලස්සනට කරයි කියලා. එයා හරි හොඳින් කල්පනාකාරීව හිතලා වැඩ කරන කෙනෙක්. ඉතින් හැමදේම හරි පිළිවෙළයි. ඒ නිසා එයා ජීවිතේ ලස්සනට ගත කරයි කියලා අපිට විශ්වාසයයි. ඕනෙම දුකක් කරදරයකදී තමන්ගේ දෙමාපියන් හැර වෙන කවුද ළඟ ඉන්නේ. විශේෂයෙන්ම මමයි මගේ බිරිඳ සහ රනිත්ගේ අම්මයි තාත්තයි තීන්දු කරලා තියෙන්නේ කිසිම වෙලාවක අපි එයාලගේ පවුල් ජීවිතේ ඇතුළට ඇඟිලි ගහන්න යන්නේ නැහැ කියන එක. ඒක ඒ අය අත්විඳින්න ඕනේ. එකම දේ විවාහ ජිවිතේ මල්යහනාවක යන්න පුළුවන් එකක් නෙවෙයි. කරදර ප්‍රශ්න පොඩි පොඩි හැලහැප්පීම් වාද විවාද තියෙන තැනක්. ඒවාට මුහුණ දෙන්න තමයි දෙන්නා සූදානම් වෙන්න ඕනේ. ආදරේ කියන්නේ තමන්ට ඕනේ දේ. ආදරේ තුළින් බලාපොරොත්තු වෙන්නේ තමන්ට ඕනේ දේ. නමුත් විවාහ ජීවිතේ තුළ ප්‍රේමයයි තියෙන්න ඕනේ. ප්‍රේමය කියන්නේ අනිත් කෙනාට ඕනේ දේ. ඒක තමයි ආදරෙයි ප්‍රේමයෙයි වෙනස. ප්‍රේම කරමින් ජීවත් වුණොතින් වැරදි සිද්ධ වෙනවා අඩුයි. ගැටලු අඩුයි. හැමදාම සතුටින් ඉන්න පුළුවන්. ඒක මම හිතනවා මේ දෙන්නා හොඳින් අත් දැකලා තියෙනවා. අපි අවවාද එකසැරයක් දීලා වැඩක් නැහැ. ඒක සූත්‍රයක් මතුරනවා වගේ ස්වේතා තරුණ යුවතියක් වුණු කාලේ ඉඳලම අපි මේවා එයාගේ කනේ තිබ්බ දේවල්. ඒ වගේම මමත් මගේ බිරිඳත් හරිම ආසාවෙන් ඉන්නේ ආච්චිලා සීයලා වෙන්න. දුවත් දරුවන්ට හරි ආදරෙයි. ඉතින් ඒකත් ඉක්මනින්ම දැක බලා ගන්න ලැබෙයි කියලා අපි හිතනවා. මේ විදියට ස්වේතා දුව ගැන නලින් පෙරේරා මතකය අවදි කරද්දී, දුවට දැනුණු හැඟීම ගැනත් අහන්න හිතුණා. එදා දැනුණු හැඟීම ශ්වේතා වචනවලට පෙරළුවේ මෙහෙම.... ඒ හැඟීම වචන කරන්න නම් මට තේරෙන්නේ නැහැ. ඒ ගැන මම දැන් හිතන්නෙත් නැහැ. මොකද ඒක දරා ගන්න ගොඩක් අමාරු මොහොතක්. මම ආවෙත් මගේ ඇගෙන් කෑල්ලක් තියලා වගේ. ඒත් ඉතින් මොනවා කරන්නද? කවදා හරි මට මෙහෙම ගෙදරින් ඈත් වෙලා ඉන්න වෙනවනේ කියලා හිත හදාගත්තා. ඒ එක්කම මට තියෙන ලොකුම සැනසීම රනිත් මට සහ මගේ පවුලේ අයට දක්වන ආදරය. අපි දෙන්නගෙම අම්මලා තාත්තලා පොඩි කාලේ ඉඳන්ම දන්න කියන අය. 2020 දී රනිත්ගේ ආන්ටි කෙනෙක් මාර්ගයෙන් අපි දෙන්නා අපි දෙන්නා ගැන දැන ගන්නේ. එතකොටත් රනිත් මෙල්බන් හිටියේ. මම ලංකාවේ. අපි දෙන්න කතා බහ කරද්දී දැනුණා අපිට අපි ගැළපෙන බව. ඒ විදියට තමයි අපේ ආදර කතාව පටන් ගන්නේ. අපි දෙන්නාට දෙන්නා හැබැහින් දැක්කේ අවුරුදු එකහමාරකින් පස්සේ. රටවල් දෙකක ඉඳන් ආදරේ කරන එක ලේසි නැහැ. අපි දෙන්න හිතන්නේ ගොඩක් දුරට එක වගේ. අපි දෙන්නා කතා කරන්න පටන් ගත්ත දවසේ ඉඳන් අද වෙනකම්ම හැමදේම අපි ශෙයා කර ගන්නවා. මට ඕනේ වුණේ මාව හොඳින් තේරුම් ගන්න මට ආදරේ කරන සහ ඉස්සරහට අපි දෙන්නටම එකතුවෙලා හොඳ ගමනක් යන්න පුළුවන්ද කියන දේ විතරයි. ඒ දේවල් සියල්ල රනිත් තුළින් මම දැක්කා. ඒ නිසා අපේ ආදර කතාව විවාහය දක්වා ආවා. ගැහැනු ළමයකුගේ සිහිනයක්නේ ලස්සන විවාහයක් කියන්නේ, ඉතින් මම හිතපු විදියටත් වඩා හැමදේම ලස්සනට සුන්දරව සිද්ධ වුණා. ඒ ගැන ලොකු සතුටක් තියෙනවා. තාත්ති මගේ ෆර්ස්ට් ඩාන්ස් එකට සින්දුවක් කරලා තිබ්බා. තාත්තිට මගේ මංගල දවසේ ඒ සින්දුව කියාගන්න බැරිවෙයි කියලා හිතලා ඒක කලින්ම පටිගත කරලා තිබ්බේ. ඒ එක්කම මගේ එකම මල්ලි එයත් මගේ පොඩි කාලේ ඉඳන් තියෙන වීඩියෝ එකතු කරලා සර්ප්‍රයිස් වීඩියෝ එකක් කරලා තිබ්බා. මල්ලි කොහොමත් වැඩිය කතා කරන කෙනෙක් නෙවෙයි. මල්ලිගේ හිතේ තිබ්බ ආදරේ එයා පෙන්නුවේ ඒ වීඩියෝ එකෙන්. ඒ හැමදේම මට ජීවිතේ කවදාවත් අමතක නොවන මතක. අපේ ජීවිතවල හැමදාම අපිට ඉන්න ශක්තිය අපේ අම්මි. අම්මි තමයි අපි හැමෝගෙම හැමදේකටම උපදෙස් දෙන්නේ. අම්මිගෙන් තමයි හැමදේම පිළිවෙළට කරන්න ඉගෙන ගත්තේ. මගෙයි රනිත්ගෙයි ආදරේ පටන් ගත්ත දා ඉඳන් අපි දෙන්නට හොඳින් ඉන්න අම්මි උපදෙස් දුන්නා. තාත්තිට කොහේ හිටියත් කියන්න තියෙන්නේ එක දෙයයි. මම තරම් තාත්තිට ආදරේ කරන කෙනෙක් මේ විශ්වයේම නැහැ. ඒක අම්මිත් දන්නවා මල්ලිත් දන්නවා රනිතුත් දන්නවා. ඒ නිසා මම කොහේ හිටියත් තාත්තිට තියෙන ආදරේ නම් අඩු වෙන්නේ නැහැ තව තවත් වැඩි වෙනවා පමණයි. තාත්ති මට කරලා දුන්නු සින්දු කීපයක් තියෙනවා. කලින් මම පෞද්ගලික අංශයේ රැකියාවක් කරපු නිසා සංගීතයට යොමු වෙන්න කාලයක් තිබ්බේ නැහැ. දැන් ඉතින් කාලය තියෙන නිසා ඉදිරියේදී බලනවා හොඳ නිර්මාණයක් එළිදක්වන්න. අනූෂා රණසිංහ