පාස්කු ඉරිදා දේවස්ථාන හා තරු පන්ති හෝටල් කිහිපයක් ඉලක්ක කර ප්‍රහාර මාලාවක් එල්ල කිරීමට ජාත්‍යන්තර ත්‍රස්ත සංවිධානයේ මගපෙන්වීම යටතේ මුස්ලිම් අන්තවාදී කණ්ඩායමක් ශ්‍රී ලංකාව තෝරාගෙන ඇත්තේ මෙරට පවතින ආරක්ෂාවේ හිඩැස් හා දේශපාලන අස්ථාවරභාවය නිසා බව බුද්ධි අංශ අනාවරණය කර ගෙන ඇත. කල් ඇතිව බුද්ධි අංශ මගින් එම ප්‍රහාර සම්බන්ධයෙන් ආරක්ෂක අංශ දැනුවත් කර තිබියදී ඒ සඳහා පිළියම් යෙදීමට නොහැකි වී ඇත්තේද එම අස්ථාවර දේශපාලන තත්ත්වය නිසා බවද සඳහන් කර තිබේ. ත්‍රස්තවාදී කණ්ඩායමක ප්‍රහාරයේ ඉලක්කයක් තිබිය යුතු අතර ඒ සඳහා අවශ්‍ය වටපිටාවද සකස් වී තිබීම විශේෂ වේ. පසුගිය 21 වැනි දින එල්ල වූ ප්‍රහාරයේ වගකීම අයි.එස්.අයි.එස්. සංවිධානය භාර ගෙන ඇත.