ජන්ද පොළවල් සඳහා ජන්ද පෙට්ටි නිකුත් කිරීමට හෙට (04) පෙරවරු 8.00 සිට කටයුතු යොදා ඇති බව මැතිවරණ කොමිෂන් සභාවේ සභාපති මහින්ද දේශප්‍රිය මහතා පවසයි. අගෝස්තු 05 වනදා පැවැත්විමට නියමිත මහමැතිවරණය පිළිබඳව පැහැදිලි කිරීම සඳහා අද ( 03) පස්වරුවේ රජයේ ප්‍රවෘත්ති දෙපාරත්මේන්තුවේ පැවති විශේෂ මාධ්‍ය හමුවකට එක්වෙමින් ඒ මහතා මේ බව සදහන් කළේය. එක් කෝටි හැට දෙලක්ෂ හැටතුන්දහස් අටසිය අසුවක් ජන්ද දායකයින් සංඛ්‍යාවක් මෙවර මහ මැතිවරණය සඳහා ජන්දය දැමීමට සුදුසුකම් ලබා තිබේ. දිවයිනේ ජන්ද කොට්ඨාශ 12,774ක පිහිටි ජන්ද මධ්‍යස්ථාන 12,985ක අනිද්දා (05) විමසීම පැවැත්වීමට නියමිතයි. මෙවර මහා මහමැතිවරණයේදී සීයයට 80 ක පමණ ජන්ද ප්‍රතිශතයක් ප්‍රකාශයට පත්වෙනු ඇතැයි තමන් විශ්වාස කරන බව මහින්ද දේශප්‍රිය මහතා සදහන් කළේය. එළඹෙන අගෝස්තු 05 වනදා පෙරවරු 7.00 සිට පස්වරු 5.00 දක්වා ඡන්ද විමසීම පැවැත්වෙන අතර පස්වරු 4 සිට 5 දක්වා කොරෝනා වසංගතය නිසා නිවෙස් නිරෝධායනයට ලක් කොට සිටි පිරිස් සඳහා වෙන් කොට ඇති බව මැතිවරණ කොමිසමේ සභාපතිවරයා වැඩිදුරටත් සඳහන් කළේය. මෙහිදී අදහස් දක්වමින් සෞඛ්‍ය අධ්‍යක්ෂක ජනරාල් විශේෂඥ වෛද්‍ය අනිල් ජාසිංහ ප්‍රකාශ කළේ කොරෝනා වෛරසය ආසාදනය වී සුවය ලබා දින 14ක නිවෙස් නිරෝධායනයට යොමු කොට සිටින පුද්ගලයින්ට තමන්ගේම වාහනයකින් සවස 4-5 අතර කාලයේදී ජන්ද පොළට පැමිණ ජන්දය ප්‍රකාශ කිරිමට හැකි බවයි.