තමන් ඇතුළුව 07 දෙනෙකුට එරෙහිව ත්‍රිපුද්ගල විශේෂ මහාධිකරණය ගොනුකර ඇති නඩු විභාගය නතර කරන ලෙස ඉල්ලා හිටපු ආරක්ෂක ලේකම් ගෝඨාභය රාජපක්ෂ අභියාචනාධිකරණය හමුවේ ගොනුකර තිබූ රීට් පෙත්සම විභාගය මේ මස 26 වනදා දක්වා අද (12) කල් තබා ඇත. එම පෙත්සම සලකා බැලූණේ අභියාචනාධිකරණ විනිසුරුවරුන් වන අචල වෙන්ගප්පුලි සහ අර්ජුන ඔබේසේකර හමුවේ වන අතර එහිදී නීතිපතිවරයා වෙනුවෙන් පෙනී සිටි අතිරේක සොලිස්ටර් ජනරාල්වරුන් සදහන් කර තිබුණේ පෙත්සම්කාර පාර්ශවයේ නොතීසි මෙතෙක් ලැබී නොමැති බවය. ඒ අනුව පෙත්සම්කාර පාර්ශවයට අදාළ නොතීසි ලබාදෙන ලෙස විනිසුරුවරුන් නියෝග කර ඇති බව සඳහන් වෙයි. මැදමුලන ඩී.ඒ. රාජපක්ෂ අනුස්මරණ කෞතුකාගාරය ඉදිකිරීමේදී රුපියල් මිලියන 33 ක මුදලක් අවභාවිතා කිරීම සම්බන්ධයෙන් හිටපු ආරක්ෂක ලේකම් ගෝඨාභය රාජපක්ෂ ඇතුළු 7 දෙනෙකුට එරෙහිව මෙම නඩුව පවරා තිබේ.