කුරුණෑගල සිට මීරිගම දක්වා වූ මධ්‍යම අධිවේගී මාර්ගයේ අතරමැද කොටසක ඉදිකිරීම් කොන්ත්‍රාත්තුව එක්සත් ජාතික පක්ෂයේ හිටපු අමාත්‍යවරයෙකු විසින් සිදුකරගෙන යන බැවින් එම කොටසේ කටයුතු නිම වන තෙක් මාර්ගයේ ඉදිරි සංවර්ධන කටයුතු අත්හිටුවී ඇති බවත් දැනට මන්දගාමීව සිදුකෙරෙන එම ඉදිකිරීම් කටයුතු කඩිනම් නොකළහොත් ඒ සඳහා නීතිමය පියවර ගන්නා බවත් වරාය හා නාවික කටයුතු සහ මාර්ග හා මහාමාර්ග සංවර්ධන ගරු අමාත්‍ය ජොන්ස්ටන් ප්‍ර‍නාන්දු මහතා පවසයි. එතුමා මේ බව පැවසූයේ මධ්‍යම අධිවේගී මාර්ගය නිරීක්ෂණ අවස්ථාවේ දී මාධ්‍යවේදීන් හමුවේ අදහස් දක්වමිනි. එහිදී වැඩිදුරටත් අදහස් දක්වමින් ගරු අමාත්‍යවරයා කියා සිටියේ, පසුගිය ආණ්ඩුවේ සහ අමාත්‍යවරුන්ගේ අවශ්‍යතාව වූයේ අධිවේගී මාර්ග සංවර්ධනය නොව ඒවායින් ගසා කෑමේ මාර්ග පාදාගැනීම පමණක් වන බවයි. “අධිවේගී මාර්ගය හදනවා විතරක් නෙවෙයි. ප්‍රදේශයේ ජනතාවට ගැටළු ගණනාවක් තිබුණා. ඒ ගැටළු වලට අපිට දෙන්න පුළුවන් විසඳුම් සහ කෙටිකාලීන සහ දීර්ඝකාලීනව ලබාදිය හැකි විසඳුම් දෙන්න තමයි අද විශේෂයෙන්ම ආවේ. ඒ වගේම කොච්චර කාලෙකින් මේක අවසන් කරන්න පුළුවන් වෙයිද කියලා ගොඩක් දෙනෙක් අහනව. ඒ කියන්නේ අපිට මීරිගම ඉඳලා කුරුණෑගල දක්වා මුත්තෙට්ටුගල දක්වා එන්න. මීරිගම ඉඳලා කඩවත දක්වා මාර්ගය අවුරුදු හතරහමාරක් තිස්සේ රජය ආරම්භ කරන්නේ නැතිව බොහොම කල්මරලා වැඩකටයුතු කරලා තියෙනවා. ඒ නිසා ඒක අපිට පටන්ගන්න වෙන්නේ කොහොමටත් මීරිගම ඉඳලා මුත්තෙටුගලට. මේක තමයි යථාර්ථය. මීරිගම ඉඳලා කඩවතට හදන්න තව අවුරුදු තුනහමාරක්, හතරක් විතර යනවා. ඉදිකිරීම් ගැන තවම මට ඉංජිනේරු මහත්තුරුවත් කවුරුවත් ගැටළුවක් කියලා නැහැ. මහනුවර අධිවේගී මාර්ගය මහනුවරින් මාර්ග ඇමති කෙනෙක් බිහිවෙලත් ඔහුට කරන්න බැරිවුණා. මුලින් ඔවුන් අධිවේගී මාර්ගයට ඇස්තමේන්තු ගතකළ මුදලට වඩා වැඩි මුදලක් පසුව ඇස්තමේන්තු කළා. ඇත්තවශයෙන්ම නුවර දිස්ත්‍රික්කයේ ඡන්දය දුන්න ජනතාවටත් කරපු විශාල අගෞරවයක් ඒක. ත්‍රෛනිකායික නායක ස්වාමීන් වහන්සේලාටත් හැමදාම බොරු කර කර හිටපු ආණ්ඩුවක් තමයි තිබුණේ. අපි වහාම වැඩ ආරම්භ කරලා ඉවර වෙලා ඊළඟ අවුරුදු තුනහමාර හතර ඉලක්ක කරගෙන නුවර දක්වා අධිවේගී මාර්ගය අවසන් කරන්න බලාපොරොත්තු වෙනවා. අපි බැංකු ක්ෂේත්‍රයෙන් අරගෙන තියෙනවා ණය. අපි 2015 ආරම්භ කළ එක කරගෙන ගියා නම් දැන් වෙද්දී ඉවරයි ඇත්ත වශයෙන්ම. ඉතින් අපිට මුදල් වලින් ප්‍ර‍ශ්නයක් නැහැ මේ සඳහා. කුරුණෑගල කොටස අපි දීලා තියෙනවා ස්ථිර වශයෙන් ජූලි 31 වෙද්දී අවසන් කරන්න ඕන කියලා. හැබැයි අපිට තියෙන ලොකුම ප්‍ර‍ශ්නය තමයි එක්සත් ජාතික පක්ෂයේ ඇමතිවරයෙක් අරන් තියෙනවා මේකෙ කොන්ත්‍රාත් එකක් මේකේ මැද කෑල්ල. ඒකෙ වැඩ දැන් බලපුවහම ඉතාමත්ම මන්දගාමීයි. ඇත්තටම කණගාටු වෙනවා ඒ තත්ත්වය ගැන. අපිට තියෙන ප්‍ර‍ශ්නය. මේක එක්සත් ජාතික පක්ෂ ආණ්ඩුවක් නෙවෙයි. අපේ ආණ්ඩුව. ඔවුන් දේශපාලනය කරලා මේ කොන්ත්‍රාත් ගත්තට අපිට ප්‍ර‍ශ්නයක් නැහැ ඒක ඔවුන්ගේ ප්‍ර‍තිපත්තියක්. අපේ ප්‍ර‍තිපත්තිය නෙවෙයි. ජූලි 31 වෙද්දී හැදුවේ නැත්නම් නීත්‍යානුකූලව අපි කටයුතු කරනවා ඒ කොන්ත්‍රාත්කරුවන්ට විරුද්ධව. ජූලි 31 වෙද්දී මේක අවසන් වෙන්න ඕන. තුන්වැනි අදියර අපි ආරම්භ කරනවා......” යැයි ද අමාත්‍යවරයා එහිදී වැඩිදුරටත් පැවසීය.