brand logo

ඉන්දීය කොවිඩ් එන්නත පිටට දීම තහනම්

05 January 2021

  සිය රටේ නිෂ්පාදනය කරන ඔක්ස්ෆෝර්ඩ්-ඇස්ට්‍රාසෙනෙකා කොවිඩ් එන්නත අපනයනය කිරීම ඉන්දීය රජය මාස කිහිපයකට තහනම් කර ඇත. ලොව විශාලතම එන්නත් නිෂ්පාදකයා වන සේරම් ආයතනයට ඉන්දීය රජය මෙම තහනම පනවා ඇත. මේ පිළිබඳව විදෙස් මාධ්‍ය වෙත අදහස් පළකර ඇති සේරම් ආයතනයේ ප්‍රධාන විධායක නිලධාරී අදාර් පුනාවල්ලා ප්‍රකාශ කර ඇත්තේ කොවිඩ් වසංගතයෙන් අවදානමට ලක්ව සිටින ඉන්දීය ජනතාව ආරක්ෂා කිරීමට සහ ඔවුන්ට ප්‍රමුඛතාව ලබාදීම සඳහා රජය මෙම තහනම පනවා ඇති බවයි. ඒ අනුව මෙම එන්නත පෞද්ගලික වෙළෙඳපොළේ විකිණීම තහනම් වන අතර සේරම් ආයතනයට එන්නත ලබාදිය හැක්කේ ඉන්දීය රජයට පමණි. මේ අතර මෙම ඔක්ස්ෆර්ඩ් - ඇස්ට්‍රොසෙනිකා එන්නත ශ්‍රී ලංකාවට ගෙන්වීම සඳහා ඉන්දීය රජය සමග සාකච්ඡා ආරම්භ කර ඇති බවත්, ඒ අනුව 2021 මාර්තු මාසය වන විට එන්නත මෙරටට ආනයනය කිරීමට හැකිවනු ඇති බවත් කොවිඩ් -19 එන්නත මෙරටට ගෙනඒමේ වැඩසටහනේ සම්බන්ධීකාරක ජනාධිපති ජ්‍යෙෂ්ඨ උපදේශක ලලිත් වීරතුංග පසුගිය සතියේ ප්‍රකාශ කළේය. ඉන්දියාව හා ශ්‍රී ලංකාව අතර පවතින ද්විපාර්ශ්වික ගිවිසුම් මගින් ඇමරිකානු ඩොලර් 04ක් වැනි මිලකට මෙම එන්නත මෙරටට ආනයනය කළ හැකි බවද හෙතෙම සඳහන් කළේය. එසේම එන්නත මෙරටට ගෙනඒම සම්බන්ධයෙන් ජනාධිපති ගෝඨාභය රාජපක්ෂ සහ ඉන්දීය අගමැති නරේන්ද්‍ර මෝදි අතර විශේෂ සාකච්ඡාවක් පැවැත්වීමට නියමිත බවද ජනාධිපති ජ්‍යෙෂ්ඨ උපදේශකවරයා අනාවරණය කර තිබිණ. ඉන්දියාවේ සේරම් ආයතනයේ ප්‍රධාන විධායක නිලධාරීවරයා ප්‍රකාශ කරන ආකාරයට ලෝක සෞඛ්‍ය සංවිධානය විසින් සිය කෝවැක්ස් (COVAX) වැඩසටහන යටතේ දිළිදු රටවලට බෙදාහැරීම සඳහා මෙම ඔක්ස්ෆර්ඩ් එන්නතින් මාත්‍රා මිලියන 300 සිට 400 දක්වා වූ ප්‍රමාණයක් ඇණවුම් කිරීමට ගිවිසුමක් සකස් කරමින් සිටී. කෙසේ වෙතත් වර්තමාන තහනම හේතුවෙන් දිළිඳු රටවලට එන්නත ලබා ගැනීමට තවත් අමතර මාස කිහිපයක් බලා සිටීමට සිදුවන බවද ඔහු ප්‍රකාශ කර ඇත. නයන තරංග ගමගේ
 

More News..